Armenııa úkimeti 2027 jyly bıýdjet tapshylyǵyn 3,4%-ǵa deıin tómendetýge nıetti
EREVAN. KAZINFORM — Keler jyly Armenııada salyq túsimderiniń ishki jalpy ónimge shaqqandaǵy úlesi 0,6 paıyzdyq tarmaqqa artady. Bul týraly «2027 jylǵa arnalǵan memlekettik bıýdjet týraly» zań jobasyn talqylaý barysynda eldiń Qarjy mınıstri Vage Ovannısıan aıtty, dep habarlaıdy Kazinform agenttiginiń Erevandaǵy menshikti tilshisi.
Vedomstvo basshysynyń málimetinshe, 2027 jyly kúrdeli shyǵystar ishki jalpy ónimniń 5,7 paıyzyna teńeledi. Al bıýdjet tapshylyǵy 4,5%-dan 3,4%-ǵa deıin tómendeıdi. Bul rette eldiń qaryzy ishki jalpy ónimniń 47% deńgeıinde turaqtanyp, aldaǵy birneshe jylda ekonomıkalyq ósim 6% shamasynda bolady.
— Al 2029 jyly salyq túsimderiniń ishki jalpy ónimdegi úlesi 25,7%-ǵa jetedi, kúrdeli shyǵystar 5,9% deıgeıinde bolsa, memlekettik qaryz 46,4%-ǵa deıin tómendeıdi jáne bıýdjet tapshylyǵy 2%-dan az bolady, — dedi Vage Ovannısıan.
Aıta keteıik, bul kúnderi Armenııa parlamentiniń turaqty komıssııalary «Armenııa Respýblıkasynyń 2027 jylǵa arnalǵan memlekettik bıýdjeti týraly» zań jobasyn birlesip talqylap jatyr.
Eske salaıyq, qazan aıynda Qazaqstan, Reseı, Belarýs jáne Qyrǵyzstan ókilderiniń Eýrazııalyq úkimetaralyq keńes aıasynda daıyndaǵan birlesken baıandamasy jarııalandy. Onda Armenııanyń EAEO-dan shyǵýy el ekonomıkasyna qalaı áser etýi yqtımal ekeni jaıly boljam jasalǵan.
