Armenııa Túrkııamen eki shekara ótkelin ashpaqshy
ASTANA. KAZINFORM - 2026-2031 jyldarǵa arnalǵan Armenııa úkimeti baǵdarlamasynyń jobasynda Túrkııamen qarym-qatynasty qalypqa keltirýge baǵyttalǵan is-sharalar, sonyń ishinde Armenııa-Túrkııa shekarasyn ashý jáne kem degende eki zamanaýı shekara ótkelin paıdalanýǵa berý kórsetilgen, dep habarlaıdy agenttiktiń aımaqtaǵy tilshisi.
Tıisti qujat 20 tamyzda ótken Armenııa úkimeti otyrysynyń kún tártibine «Armenııa Respýblıkasy Úkimetiniń baǵdarlamasy týraly» tarmaq boıynsha engizildi. Baǵdarlamanyń jobasy, negizdemesi jáne osy tarmaqtyń qosymshasy resmı elektrondyq úkimet portalynda jarııalandy.
Baǵdarlama jobasynda Armenııa men Túrkııa arasynda dıplomatııalyq qarym-qatynas ornatý, Armenııa-Túrkııa shekarasyn ashý jáne «kem degende eki zamanaýı shekara ótkelin» paıdalanýǵa berý, sondaı-aq kólik, energetıka jáne tsıfrlyq ınfraqurylymdy qaıta iske qosý, ekijaqty saýda qatynasyn damytý jospary kórsetilgen.
Alaıda qujatta qandaı shekara ótkeli paıdalanýǵa beriletini josparlanǵany nemese olardy iske qosýdyń naqty merzimi kórsetilmegen. Armenııa men Túrkııa arasyndaǵy qurlyq shekarasy qazirgi ýaqytta arnaıy kelisim bolmasa, úshinshi el azamattary men júk tasymaly úshin jabyq.
Armenııa men Túrkııa 2022 jyldan beri qarym-qatynasyn qalypqa keltirý boıynsha kelissóz júrgizip keledi, shekarany ashý jáne kólik baılanysyn qalpyna keltirý máselesi qaralyp jatyr.
Buǵan deıin Armenııa Ázerbaıjanmen ekijaqty saýda-sattyqty jandandyratynyn habarladyq.
