Armenııa Túrkııa arqyly Eýropaǵa temirjol qatynasyn ashty
ASTANA. KAZINFORM — Armenııa premer-mınıstri Nıkol Pashınıan Ahalkalakı–Kars temirjolynyń júk tasymaly úshin tolyq iske qosylǵanyn málimdedi, dep Kazinform agenttiginiń menshikti tilshisi.
— Armenııadan eksport pen ımport úshin Ahalkalakı–Kars temirjoly, sondaı-aq Ázerbaıjan arqyly ótetin temirjol jelisi de ashylǵanyn qýana habarlaımyn. Bul bizdiń eldiń ekonomıkalyq ómirindegi mańyzdy oqıǵa. Túrkııa men Grýzııadaǵy seriktesterge alǵys aıtamyn, — dedi Pashınıan.
Onyń aıtýynsha, qazirgi ýaqytta Armenııanyń Reseımen Grýzııa aýmaǵy arqyly, sondaı-aq Ázerbaıjan arqyly temirjol qatynasy bar. Sonymen qatar Qytaımen Reseı jáne Qazaqstan arqyly baılanys qamtamasyz etilgen. Budan bólek, Grýzııa jáne Túrkııa aýmaqtary arqyly Eýropalyq odaqpen temirjol qatynasy iske qosylǵan.
— Bolashaqta Armenııa–Túrkııa, Armenııa–Ázerbaıjan, keıinnen Nahıchevan arqyly Armenııa–Iran temirjoldarynyń ashylýy kútilýde. Biz bul oqıǵalardyń jaqyn bolashaqta TRIPP jobasynyń júzege asýy nátıjesinde kýási bolamyz, — dep jazdy premer-mınıstr Telegram-arnasynda.
Keıin ol Shırak oblysyndaǵy Sarnagbıýr eldi mekeninde ótken saılaýaldy naýqan aıasyndaǵy sózinde Gıýmrı–Akıaka (Túrkııa) jáne Erash temirjol ýchaskelerin qaıta jańartý bastalatynyn aıtty.
— Túrik tarapynda jumystar qazirdiń ózinde bastaldy, temirjol ashylady. Biz de Erash torabyn jańartýǵa kirisemiz. Úkimet muny óz moınyna alady. Kontsessııalyq kelisim bolǵanyna qaramastan, biz qarjy bólip, joldy jóndep, qaıta qalpyna keltiremiz, temirjol qatynasy ashylady, — dedi ol.
Buǵan deıin Ázerbaıjan men Grýzııa alty jyldyq úzilisten keıin temirjol qatynasyn qaıta bastaǵany habarlanǵan edi.
