Armenııa «Tramp joly» jobasyn iske asyrýǵa taǵy bir qadam jasady
ASTANA. KAZINFORM — Armenııa parlamenti Erevan men AQSh arasyndaǵy «Tramp atyndaǵy halyqaralyq beıbitshilik pen órkendeý joly» (TRIPP) jobasy boıynsha strategııalyq yntymaqtastyq týraly jalpylama kelisimdi ratıfıkatsııalady, dep habarlaıdy Kazinform agenttiginiń menshikti tilshisi Armenpress-ke silteme jasap.
Qujatty 63 depýtat qoldap, 32 depýtat qarsy daýys berdi.
Bıliktegi «Azamattyq shart» fraktsııasy qujatty qoldasa, oppozıtsııalyq «Kúshti Armenııa» jáne «Armenııa» fraktsııalary qarsylyq tanytqan.
Qujatty parlamentke usyna otyryp, Armenııanyń syrtqy ister mınıstri Ararat Mırzoıan respýblıka ishindegi barlyq jobalyq ınfraqurylym Armenııanyń egemendigi men ulttyq ıýrısdıktsııasy aıasynda jumys isteıtinin málimdedi.
Onyń aıtýynsha, joba aımaqtyq kommýnıkatsııalardy ashýdy, Armenııa ishinde temirjol qyzmetin qamtamasyz etýdi jáne eldiń Ázerbaıjan arqyly úshinshi el naryqtaryna shyǵýyna jaǵdaı jasaýdy kózdeıdi. Óz kezeginde Ázerbaıjan Armenııa arqyly Nahıchevanmen kólik baılanysyn ornatady.
Kelisim aıasynda TRIPP Development Company qurylmaq. Armenııa tarapy aktsııalardyń 26%-yna, al Amerıka 74%-yna ıelik etedi. Yntymaqtastyqtyń bastapqy merzimi 49 jyl. Eger ózara kelisim boıynsha taǵy 50 jylǵa uzartylsa, Armenııanyń úlesi 49%-ǵa deıin artady, al AQSh qolynda 51% úles qalady.
Ararat Mırzoıan sonymen qatar kompanııanyń jarǵysy men aktsıonerler kelisimi áli kelisilmegenin jáne bekitilmegenin málimdedi. Onyń aıtýynsha, Amerıkanyń teńquryltaıshy kompanııasy yntymaqtastyqtyń barlyq kezeńinde AQSh úkimetiniń menshiginde jáne basqarýynda bolady.
Jalpylama kelisimge 2026 jyldyń maýsym aıynda qol qoıylǵan.
Buǵan deıin Nıkol Pashınıan TRIPP jobasy Armenııa ekonomıkasyna tyń serpin beretinin aıtqan bolatyn.
