Armenııa «Tramp baǵyty» jobasy qurylysynyń bastalý merzimin jarııalady

ASTANA. KAZINFORM – Qurylystyń bastalýyn qarastyratyn «Tramp baǵyty» jobasynyń (TRIPP) praktıkalyq kezeńi 2026 jylǵa belgilengen, dep habarlaıdy Kazinform menshikti tilshisi. 

Armenııa syrtqy saıası vedomstvosynyń naqtylaýynsha, respýblıka «Halyqaralyq beıbitshilik pen órkendeý úshin Tramp baǵyty» jobasynyń quqyqtyq bazasy men retteýshi tetikterin ázirleý boıynsha amerıkalyq tarappen belsendi kelissóz júrgizip jatyr.

SІM sondaı-aq armıan-amerıkalyq birlesken kásiporyn – TRIPP Company Armenııada tirkeletinin habarlady. Kompanııaǵa temirjol jáne avtomobıl joldary, munaı jáne gaz qubyrlary jáne talshyqty-optıkalyq baılanys jelileri sııaqty qajetti ınfraqurylymdy damytýǵa ókilettik berý josparlanyp otyr. 

Jobanyń aımaqtyq baılanysty nyǵaıtýǵa baǵyttalǵan aýqymdy ınfraqurylymdyq bastamalar tujyrymdamasyna sáıkes keletini atap ótildi. Olardyń arasynda Transkaspıı halyqaralyq kólik baǵyty (THKB, «Orta dáliz») jáne «Parsy shyǵanaǵy – Qara teńiz» halyqaralyq kólik dálizi bar. 

Buǵan deıin Armenııa premer-mınıstri Nıkol Pashınıan parlament otyrysynda eldegi TRIPP temirjol baǵytynyń qurylysy 2026 jyldyń ekinshi jartysynda bastalady dep josparlanyp otyrǵanyn málimdedi.

Sondaı-aq Armenııa AQSh-pen birge TRIPP baǵytyn jalǵa alý merzimin talqylaǵanyn jazdyq.