21:04, 27 Tamyz 2025 | GMT +5
Armenııa soty burynǵy prezıdent Serj Sargsıannyń isin qaıta qaraýǵa kiristi
ASTANA.KAZINFORM - Armenııanyń sybaılas jemqorlyqqa qarsy soty eldiń úshinshi prezıdenti Serj Sargsıanǵa qatysty qylmystyq isti qaraýǵa kiristi, dep habarlaıdy Kazinform menshikti tilshisi.
Іs Erevandaǵy Isakov dańǵylynda ornalasqan jáne Qorǵanys mınıstrliginiń teńgerimindegi 11 gektar jer telimin ıelikten shyǵarýǵa qatysty.
Tergeý málimetteri boıynsha, 2005-2006 jyldary Serj Sargsıan Qorǵanys mınıstri qyzmetin atqarǵan kezde bul jer tikeleı naryq baǵasynan aıtarlyqtaı tómen baǵaǵa satylǵan.
Buǵan deıin Armenııanyń burynǵy prezıdentine asa iri kólemde para aldy, sondaı-aq kásipkerlik qyzmetke zańsyz qatysty degen aıyp taǵylǵany habarlanǵan bolatyn.