Armenııa Prezıdenti Úkimet basshysyn taǵaıyndady

ASTANA. QazAqparat - Armenııa Prezıdenti Serj Sargsıan eldiń Premer-Mınıstri laýazymyna Ovık Abraamıandy taǵaıyndaý týraly Jarlyqqa qol qoıdy. Bul týraly «Gazeta.Ru» habarlaıdy.

Armenııa Respýblıkalyq partııasynyń keńesi men atqarýshy organ Úkimet basshysy qyzmetine 56 jasar Abraamıannyń kandıdatýrasy tolyq laıyq dep quptady. Buǵan deıin saıasatker atalǵan partııa tóraǵasynyń orynbasary boldy. Eske sala keteıik, oǵan deıin Armenııanyń Úkimetin basqarǵan Tıgran Sarkısıan 2014 jyldyń 3 sáýirinde otstavkaǵa ketken bolatyn.