Armenııa Prezıdenti Qazaqstannyń jetistikterine joǵary baǵa berdi

EREVAN. QazAqparat - Qazaqstan Elshisi Bolat Imanbaev Armenııa Prezıdenti Armen Sarkısıanǵa senim gramotalaryn tapsyrdy. QazAqparat bul týraly elimizdiń Syrtqy ister mınıstrligine silteme jasap habarlaıdy.

Saltanatty rásimnen keıin ótken kezdesý barysynda taraptar saýda-ekonomıkalyq jáne mádenı-gýmanıtarlyq ózara is-qımyldy keńeıtý qajettiligine basa nazar aýdara otyryp, yntymaqtastyqtyń basym baǵyttaryn egjeı-tegjeıli talqylady.

«COVID-19 pandemııasynan týyndaǵan qolaısyz jaǵdaıǵa qaramastan, 2020 jyly eki ese ósken saýdanyń oń dınamıkasyna ózara qanaǵattaný baıqaldy. Іskerlik baılanystardy damytý jáne ınvestıtsııalar, qarjy jáne joǵary tehnologııalar salalarynda birlesken jobalardy ázirleý boıynsha birlesken kúsh-jigerdi jalǵastyrýdyń mańyzdylyǵy atap ótildi. Aǵymdaǵy jyly saýda-ekonomıkalyq yntymaqtastyq jónindegi birlesken úkimetaralyq komıssııanyń otyrysyn ótkizý jónindegi josparlar talqylandy», - delingen aqparatta.

Sondaı-aq Elshi Prezıdent Qasym-Jomart Toqaevtyń eldi odan ári demokratııalandyrýǵa baǵyttalǵan jańa reformalarymen, ekonomıkalyq jańǵyrtýdyń ózekti baǵdarlamalarymen jáne Qazaqstannyń halyqaralyq bastamalarymen tanystyrǵan. Óz kezeginde «Armenııa Prezıdenti elimizdiń jetistikterine, sondaı-aq Q. Toqaevtyń bastamasymen qolǵa alynǵan saıası reformalarǵa joǵary baǵa berdi. A. Sarkısıan qazaqstandyq qoǵamnyń birligi men ulttyq kelisim modeliniń biregeıligin jáne Qazaqstannyń Tuńǵysh Prezıdenti – Elbasy Nursultan Nazarbaevtyń ony tabysty iske asyrýdaǵy negizgi rólin erekshe atap ótti. Halyqaralyq saıası dıalogtyń senimdi deńgeıin jáne qolda bar áleýet pen qos ózara is-qımyldyń keleshegin atap ótip, ol sondaı-aq Qazaqstan basshylyǵyna óziniń izgi tilekterin jetkizýdi surady.

Áńgime sońynda A. Sarkısıan Elshini qyzmetine resmı kirisýimen quttyqtap, dıplomatııalyq mıssııasyn iske asyrý isinde tabys tiledi», - dedi QR SІM-nen.