Armenııa Prezıdenti Qazaqstandaǵy reformalardy qoldady

EREVAN. QazAqparat - Qazaqstan Elshisi Bolat Imanbaev Armenııa Prezıdenti Vaagn Hachatýrıanmen kezdesip, Prezıdent Qasym-Jomart Toqaevtyń «Jańa Qazaqstan: jańarý men jańǵyrý joly» atty Joldaýynyń negizgi qaǵıdalary týraly habardar etti. Bul týraly QR Syrtqy ister mınıstrliginen málim etti, dep habarlaıdy QazAqparat.

Óz kezeginde, V.Hachatýrıan QR Prezıdentiniń «Jańa Qazaqstandy» qurý jónindegi bastamalaryn joǵary baǵalady. Onyń aıtýynsha, transformatsııalaý boıynsha usynylǵan reformalardy iske asyrý eldi zamanaýı jahandyq syn-qaterler jaǵdaıynda damýdyń jańa sapaly deńgeıine kóteredi. Qazaqstan basshylyǵynyń saıasatyna qoldaý bildire otyryp, ekonomıkasy myqty áleýmettik memleket qurý jolyndaǵy qazaqstandyq tájirıbe Armenııa úshin mańyzdy ekenin habarlady.

Sonymen qatar, taraptar saıası, saýda-ekonomıkalyq jáne mádenı-gýmanıtarlyq salalardaǵy qazaqstan-armıan yntymaqtastyǵyn damytý máselelerin, 2022 jyly ótetin halyqaralyq is-sharalar men joǵary jáne asa joǵary deńgeıdegi ekijaqty kezdesýlerdiń kestesin talqylady.

Taraptar 2021 jyldyń qorytyndysy boıynsha 30 paıyzǵa ósken ekijaqty taýar aınalymynyń oń dınamıkasyna nazar aýdaryp, iskerlik baılanystardy damytý jáne ortaq ekonomıkalyq jobalardy iske asyrý boıynsha birlesken kúsh-jigerdi jalǵastyrýdyń mańyzdylyǵyn atap ótti.

Armenııa Prezıdenti elderimiz arasyndaǵy ózara tıimdi qarym-qatynastardy odan ári nyǵaıtýǵa daıyn ekenin málimdedi.