Armenııa premeriniń Instagram júrgizý máneri kópshilikti qyzyqtyrady

ASTANA. KAZINFORM — Armenııa premer-mınıstri Nıkol Pashınıan kóp kóshbasshydan áleýmettik jelilerdi paıdalaný tásilimen erekshelenedi, al onyń jarııalanymdary keń aýdıtorııanyń qyzyǵýshylyǵyn týdyrady.

Pashınıan, ásirese, amerıkandyq Instagram jelisindegi jazbalary arqyly kóp paıdalanýshynyń nazaryn aýdarady. Onyń Instagram paraqshasynda shamamen 670 myń oqyrman bar. Premer kúnin dástúrli tańǵy posttardan bastaıdy.

Tańǵy jarııalanymdarynda Pashınıan ártúrli tilderde mýzyka tyńdaıdy, al vıdeo sońynda kameraǵa «júrek» belgisin jasap, «Men sizderdi jaqsy kóremin» degen habarlamasyn jetkizedi.

Premer óz oqyrmandarymen kúndelikti ómirinen kóp sátti bólisedi: keıde baraban nemese pıanınoda oınaǵanyn, kóńil kóteretin jerlerdegi vıdeolaryn, sondaı-aq top bolyp bılegen sátterin jarııalaıdy.

Pashınıan jıi jarııalaıtyn jazbalarynyń biri — velosıpedpen ártúrli qalalardy aralap júrip kórgen kórinisterin kórsetý. Ol bul vıdeolardy Erevanda da, shetelge saparlary kezinde de túsirip, áleýmettik jelilerge salady.

Premer-mınıstr Tbılısı, Rım, Parıj, Berlın, Máskeý sııaqty qalalardyń kóshelerinde velosıped tebip, óz tájirıbesin jáne oı-pikirlerin áleýmettik jeli qoldanýshylarymen bólisedi.

Pashınıannyń kıiný stıli de kópshiliktiń nazaryn aýdarady. Sońǵy ýaqytta ol jumys saparlary kezinde de keıde djıns kıip júrip, posttaryna júzdegen pikir alady.

Sońǵy jarııalanymynda Pashınıan oqyrmandaryna «Qaıyrly kesh» tilep, tanymal Pink Floyd mýzykalyq tobynyń dıskin kórsetip, «júrek belgisin» jasady.

Sonymen qatar, ol paraqshasynda resmı kezdesýleri men baıandamalary týraly aqparat jarııalap otyrady.

Budan buryn Nıkol Pashınıan Astanada qazaqsha án tyńdap otyrǵan vıdeosyn jarııalaǵanyn jazǵan edik.