Armenııa Parlamentiniń spıkeri Májiliske keldi
ASTANA. KAZINFORM — Májilis tóraǵasy Erlan Qoshanov Astanaǵa resmı saparmen kelgen Armenııa Respýblıkasy Ulttyq jınalysynyń tóraǵasy Alen Sımonıanmen kezdesti, dep habarlaıdy vedomstvonyń baspasóz qyzmeti.
Mártebeli meımandy qarsy alǵan Erlan Qoshanov Armenııanyń Ońtústik Kavkaz aımaǵyndaǵy Qazaqstan úshin mańyzdy áriptes ekenin atap ótti. Májilis spıkeri bizdiń elimiz Armenııa basshylyǵy júzege asyryp jatqan aýqymdy saıası, ekonomıkalyq jáne áleýmettik reformalardy úlken qyzyǵýshylyqpen baqylap otyrǵanyn aıtty.
— Byltyr Qazaqstan men Armenııa arasyndaǵy dostyq jáne yntymaqtastyq týraly sharttyń 25 jyldyǵyn atap óttik. Bul mereıtoıǵa oraı memleket basshylarynyń resmı saparlar almasýynyń sımvoldyq máni zor. Bul eki mańyzdy oqıǵa jańa geosaıası jaǵdaılardaǵy memleketterimiz arasyndaǵy yntymaqtastyqqa qýatty qarqyn berdi. Onda áriptestigimizdiń barlyq salalaryn qamtıtyn birqatar kelisimge qol qoıyldy, — dedi Erlan Qoshanov.
Kezdesý barysynda Parlament spıkerleri joǵary deńgeıde qol jetkizilgen kelisimderdi zańnamalyq turǵydan rásimdeý jáne jańa ekonomıkalyq ári mádenı jobalardy qoldaý máselelerin talqylady.
Májilis tóraǵasy armıan áriptesin elimizde júrgizilip jatqan reformalar men zań shyǵarý jumysy jaıynda habardar etti. Áńgime barysynda taraptar Qazaqstanda qabyldanǵan áleýmettik ádildik, zań ústemdigi men tártipti nyǵaıtýǵa baǵyttalǵan zańdardyń Armenııa úshin qyzyǵýshylyq týdyratynyn atap ótti. Osy oraıda depýtattar beıindi komıtetter arqyly tájirıbe almasýǵa kelisti.
Óz kezeginde Alen Sımonıan parlamentter arasyndaǵy qarym-qatynasty jandandyrý qajettigine nazar aýdardy.
— Parlamentaralyq baılanystyń damýy ózara túsinistikti tereńdetýge, senimdi nyǵaıtýǵa, sondaı-aq ekijaqty kelisimderdi tıimdi júzege asyrýǵa septigin tıgizedi. Bıyl sáýir aıynda ótken Qazaqstan mádenıeti kúnderi Armenııa úshin mádenı-gýmanıtarlyq saladaǵy mańyzdy oqıǵaǵa aınaldy. Sonymen birge Armenııa tarapy Qazaqstan bıligi men halqynyń armıan dıasporasyna degen kózqarasyn joǵary baǵalaıdy. Ol — elderimiz ben halyqtarymyz arasyndaǵy mańyzdy dáneker, — dedi Ulttyq jınalys tóraǵasy.
Sonymen qatar taraptar ekonomıka, logıstıka, mádenı-gýmanıtarlyq saladaǵy yntymaqtastyqtyń keń aýqymdy máselelerin de talqylady.
Buǵan deıin Májilis tóraǵasy Baýyrjan Momyshulynyń eskertkishine gúl shoqtaryn qoıǵanyn jazdyq.