Armenııa parlamentinde depýtattar tóbelesti
EREVAN. KAZINFORM — Armenııa parlamentinde (Ulttyq jınalys) bılik jáne oppozıtsııa partııalarynyń depýtattary arasynda bolǵan kelispeýshiliktiń sońy tóbelespen aıaqtaldy, dep habarlaıdy Kazinform agenttiginiń Erevandaǵy menshikti tilshisi.
Janjal oppozıtsııalyq «Kúshti Armenııa» fraktsııasynyń depýtaty Edgar Kazarıannyń baıandamasy kezinde bastaldy. Ulttyq jınalystyń tóraǵasy Rýben Rýbınıan onyń sózi talqylanyp jatqan máselege qatysy joq ekenin málimdep, mıkrofonyn óshirdi.
— Keshirińiz, siz kóterip otyrǵan máseleniń kún tártibine qatysy joq. Sondyqtan osy jerden toqtatýǵa májbúrmin, — dedi Rýben Rýbınıan.
Edgar Kazarıan bolsa ózine bólingen ýaqytty tolyq paıdalanýǵa quqyly ekenin jetkizip, mıkrofondy qaıta qosýdy talap etti. Bul rette jaǵdaıǵa oppozıtsııanyń basqa ókilderi aralasqannan keıin Armenııa Ulttyq jınalysynyń tóraǵasy depýtatqa sózin jalǵastyrýǵa múmkindik berdi.
Osydan keıin Edgar Kazarıan Rýben Rýbınıandy depýtattarǵa syıaqy berip, memlekettiń qarajatyn talan-tarajǵa saldy dep aıyptady.
— Sizderge bul 250 myń dramdy jumsamaýǵa keńes beremin. Biz ony tıynyna deıin qaıtaramyz, — dedi Edgar Kazarıan.
Bul málimdemeden soń Ulttyq jınalystyń tóraǵasy mıkrofondy qaıta óshirdi. Osy sátte «Azamattyq kelisim» bılik partııasynyń depýtaty Vaage Galýmıan oppozıtsııalyq «Kúshti Armenııa» fraktsııasynyń ókilderine qaraı bet aldy. Artynsha depýtattar birin-biri julqylap, janjal bastalyp, sońy tóbeleske ulasty.
Vıdeo: t.me/yerevantodaý
Eske salaıyq, taıaýda BUU Bas Assambleıasynyń 81-sessııasy aıasynda sóz sóılegen Túrkııa prezıdenti Rejep Taııp Erdoǵan Armenııamen saýda jáne kólik baılanystaryn qalypqa keltirýdi qoldaıtynyn málimdedi.
Qosa ketsek, 19-30 qazan aralyǵynda Armenııa astanasynda BUU-nyń Bıologııalyq alýantúrlilik jónindegi konventsııasyna qatysýshy taraptardyń 17-shi konferentsııasy (COP17) ótedi.
