Armenııa parlamenti TRIPP jobasy týraly kelisimdi ratıfıkatsııalaýǵa kirisedi
EREVAN. KAZINFORM – Armenııa úkimeti «Halyqaralyq beıbitshilik pen órkendeý jolyndaǵy Tramp baǵyty» (TRIPP) jobasynyń negizdemelik kelisimin ratıfıkatsııalaý jónindegi zań jobasyn Ulttyq jınalystyń qaraýyna engizdi, dep habarlaıdy Kazinform agenttiginiń Erevandaǵy menshikti tilshisi.
Parlamenttiń resmı saıtynda jarııalanǵan málimetke sáıkes, osy aptada depýtattar qujatty talqylaýǵa kirisedi. Ulttyq jınalysta qaralatyn zań jobasyn Armenııanyń Syrtqy ister jáne halyqaralyq saýda mınıstri Ararat Mırzoıan tanystyrmaq.
Eske salaıyq, AQSh pen Armenııa taraptary bul kelisimge bıyl 1 maýsymda Vashıngtonda jáne 4 maýsymda Erevanda qol qoıǵan. Al 16 shildede úkimet ony ratıfıkatsııalaý týraly zańnamalyq bastamany maquldady.
Taıaýda atalǵan eldiń premer-mınıstri Nıkol Pashınıan TRIPP jobasy Armenııa ekonomıkasyna tyń serpin beretinin málimdedi.
Buǵan deıin habarlaǵanymyzdaı, Armenııa men AQSh TRIPP jobasy aıasynda birlesken kompanııa qurýǵa nıet bildirdi.
