Armenııa men Túrkııa ózara saýdadaǵy kedendik rásimderdi tikeleı júrgizýge kóshti

ASTANA. KAZINFORM — Armenııa men Túrkııa qurlyqtaǵy shekarasy áli de jabyq bolǵanyna qaramastan, ózara saýdadaǵy kedendik rásimderdi tikeleı júrgizýge múmkindik beretin kedergilerdi joıdy. Bul týraly Kazinform agenttiginiń menshikti tilshisi Armenpress basylymyna silteme jasap habarlaıdy.

Komıssııý po vodnym bıoresýrsam Kaspııskogo morıa v 2027–2028 godah vozglavıt Azerbaıdjan
Foto: Report.az

Bul jóninde 5 qarashada Armenııanyń Syrtqy ister mınıstri Ararat Mırzoıan Ulttyq jınalystyń turaqty komıssııalarynyń birlesken otyrysynda málimdedi.

Onyń aıtýynsha, buǵan deıin Erevan men Ankara arasyndaǵy saýda operatsııalary tehnıkalyq turǵydan úshinshi elder arqyly rásimdelip kelgen. Endi kedendik rásimder eki el arasynda tikeleı júrgiziledi. Alaıda taýarlardy fızıkalyq tasymaldaý burynǵydaı Grýzııa aýmaǵy arqyly tranzıtpen júzege asyrylady.

Mınıstr bul qadamdy Armenııa men Túrkııa arasyndaǵy qarym-qatynasty qalypqa keltirý úderisiniń bir bóligi dep atady. Onyń sózinshe, ekijaqty yntymaqtastyq belsendi ári nátıjeli damyp keledi.

Birlesken jobalardyń qatarynda tarıhı Anı kópirin qalpyna keltirý, bilim berý baǵdarlamalary jáne armıan-túrik bıznes forýmdaryn ótkizý bar. Kelesi forýmdy 2027 jyly Armenııada uıymdastyrý josparlanyp otyr.

Sonymen birge Ararat Mırzoıan eki el arasyndaǵy qurlyqtaǵy shekaranyń ázirge jabyq ekenin atap ótti. Alaıda onyń pikirinshe, qarym-qatynasty qalypqa keltirý úderisi shekarany ashý men dıplomatııalyq qatynastar ornatý kez kelgen ýaqytta júzege asýy múmkin deńgeıge jetken.

Ázerbaıjanmen qarym-qatynasqa toqtalǵan mınıstr Erevannyń Bakýmen beıbit kelisimge múmkindiginshe tezirek qol qoıyp, ony keıin ratıfıkatsııalaýǵa nıetti ekenin aıtty. Sonymen qatar Armenııa beıbitshilikti nyǵaıtý maqsatynda ekijaqty saýdany qosa alǵanda, praktıkalyq yntymaqtastyqty keńeıtýdi kózdeıdi.

Mınıstr Grýzııa jáne Iranmen strategııalyq áriptestikti odan ári damytý nıetin de rastady.

Buǵan deıin Armenııa Ázerbaıjanǵa qarsy halyqaralyq sot ınstantsııalaryna bergen talap-aryzdaryn eki el arasynda beıbit kelisimge túpkilikti qol qoıylǵannan keıin qaıtaryp alatynyn jazǵan bolatynbyz.