Armenııa men Túrkııa ózara qarym-qatynasty jandandyrýǵa nıetti
EREVAN. KAZINFORM – Antalıa qalasynda ótken COP31 kóshbasshylar sammıti aıasynda Armenııanyń premer-mınıstri Nıkol Pashınıan Túrkııa prezıdenti Rejep Taııp Erdoǵanmen kezdesti, dep habarlaıdy Kazinform agenttiginiń Erevandaǵy menshikti tilshisi.
Rejep Taııp Erdoǵan Armenııa úkimeti basshysynyń Antalıaǵa saparyn jáne onyń kóshbasshylar sammıtine qatysýyn joǵary baǵalady. Óz kezeginde Nıkol Pashınıan Túrkııa prezıdentin is-sharanyń joǵary deńgeıde uıymdastyrylýymen quttyqtady.
Kezdesý barysynda taraptar eki el arasyndaǵy qarym-qatynasty jandandyrý máselesin talqylap, ol úshin naqty qadamdar jasaýǵa beıil ekenin atap ótti. Olardyń oıynsha, bul baǵyttaǵy jumysty sapaly jalǵastyryp, saýda-ekonomıkalyq baılanystardy odan ári damytý mańyzdy.
Nıkol Pashınıan men Rejep Taııp Erdoǵan óńirdegi ahýalǵa qatysty da pikir almasty. Ásirese, Armenııa men Ázerbaıjan arasynda beıbitshiliktiń ornaýy aımaqtyq yntymaqtastyqty damytýǵa jańa serpin berdi.
Sonymen qatar taraptar kólik dálizderin ashý máselesin, onyń ishinde TRIPP jobasyn júzege asyrý jónindegi josparlardy talqylady.
Eske salaıyq, jaqynda Nıkol Pashınıan Armenııa men Túrkııanyń taıaý jyldary dıplomatııalyq qarym-qatynas ornatatynyna senim bildirgen edi.
