Armenııa men Qyrǵyzstannyń Kedendik odaqqa kirýi boıynsha jumystar atqarylýda - Birinshi vıtse-premer
«Byltyr Qyrǵyzstan men Armenııa Biryńǵaı ekonomıkalyq keńistikke ený jóninde usynys tastaǵan bolatyn. Bul jerde Qyrǵyzstan men Armenııany jeke qarastyrý qajet. Sebebi Qyrǵyzstan tek Kedendik odaqqa enýge kelisimin berip otyr. Osy taqyrypty talqylaý barysynda Qyrǵyzstan Kedendik odaqqa ený jónindegi jol kartasyn qabyldaýdan bas tartty. Sebebi olar qol qoıar aldynda Kedendik odaqtyń quzyretine jatpaıtyn birqatar jańa talaptar qoıdy. Mysaly, olar Kedendik odaq «úshtigi» Qyrǵyzstanda eksportqa baǵyttalǵan óndiris ashý, mıllıonnan astam adam jumys isteıtin Dordoı men Qarasý syndy bazarlaryna erkin ekonomıkalyq aımaq mártebesin berý, sonymen qatar eńbek mıgratsııasynyń erkin júrýi syndy talaptardy alǵa qoıdy. Bul Kedendik odaqtyń quzyrynda emes. Qazirgi ýaqytta Qyrǵyzstanda jańa úkimet jasaqtaldy. Múmkin bolashaqta jańa úkimet quramymen biz ortaq sheshimge kelemiz dep oılaımyn. Qyrǵyzstan boıynsha jaǵdaı osyndaı», - dep atap ótti vıtse-premer.
Onyń aıtýynsha, Armenııa Qyrǵyzstanǵa qaraǵanda, naqty jumystardy 90 paıyzǵa aıaqtap qalǵan.
«Armenııa Kedendik odaqqa da, Biryńǵaı ekonomıkalyq keńistigine de enýge múddeli. Armenııa tarapy odaqqa kirý boıynsha jol kartasyn 90 paıyzǵa aıaqtady. Armenııa úkimetiniń málim etkenindeı, Eýrazııalyq ekonomıkalyq odaqty qurý jónindegi shartty qol qoıý merzimine deıin bul jumys aıaqtalady. Biraq bastapqyda biz EEO qurýdy tek úsh el qol qoıady - Qazaqstan, Reseı jáne Belarýs. Buǵan engisi keletin elder tek qosylatyn bolady», - dedi ol.
