Armenııa men Qytaı tasymaldaýshylarǵa jeńildikter berý týraly kelisti
ASTANA. KAZINFORM – Armenııa men Qytaı jolaýshylar men júkterdi halyqaralyq avtomobıl kóligimen tasymaldaýdy jeńildetý týraly kelisimge qol qoıdy, dep habarlaıdy agenttiktiń aımaqtaǵy menshikti tilshisi Armenpress basylymyna silteme jasap.
Qujat tasymaldaýshylarǵa arnaıy ruqsat berý júıesin engizýdi jáne birqatar jol alymdarynan bosatýdy kózdeıdi. Taraptar bul kelisimge Beıjińde ótken Transkaspıı halyqaralyq kólik baǵytyn damytý jónindegi kezdesý barysynda qol jetkizdi.
Armenııanyń aýmaqtyq basqarý jáne ınfraqurylym mınıstriniń orynbasary Krıstına Galechıannyń aıtýynsha, ruqsattar eki sanat boıynsha beriledi. Birinshisi – kádimgi júkterge, ekinshisi – arnaıy júkterge arnalǵan. Bul tasymaldaýshylarǵa halyqaralyq jáne tranzıttik tasymaldardy jeńildetilgen tártippen júzege asyrýǵa múmkindik beredi.
– Kelisim halyqaralyq jáne tranzıttik tasymaldardy jeńildetýge baǵyttalǵan. Alaıda onyń talaptary Armenııa men Qytaı aýmaǵyndaǵy ishki tasymaldarǵa qoldanylmaıdy, – dep túsindirdi Krıstına Galechıan.
Taraptar sondaı-aq avtomobıl joldaryn paıdalanǵany úshin alynatyn birqatar salyqtar men alymdardan tasymaldaýshylardy ózara bosatýǵa ýaǵdalasty. Alaıda kólik quraldarynyń joldarǵa keltirgen zalalyn óteýge arnalǵan tólemder saqtalady.
Galechıannyń sózinshe, kezdesýde Transkaspıı halyqaralyq kólik baǵyty boıynsha júk tasymaly kólemin ulǵaıtý, ınfraqurylymdy damytý, shekaralyq jáne kedendik rásimderdi jeńildetý, sondaı-aq logıstıkany tsıfrlandyrý máseleleri talqylandy.
Kelisimde eki el arasynda kelisilgen baǵyttar men belgilengen shekaralyq ótkizý pýnktteri arqyly turaqty jáne turaqty emes halyqaralyq avtobýs qatynasyn uıymdastyrý múmkindigi de qarastyrylǵan.
Tasymaldaýshylarǵa ruqsattardy Armenııa tarapynan Aýmaqtyq basqarý jáne ınfraqurylym mınıstrligi, al Qytaı tarapynan Kólik mınıstrligi beredi.
Aıta keteıik, buǵan deıin Armenııanyń Ázerbaıjan jáne Túrkııamen temirjol qatynasyn qaıta jandandyrýdy josparlap otyrǵany habarlanǵan bolatyn. Bul bastama óńirdegi kólik-kommýnıkatsııalyq baılanystardy damytýǵa baǵyttalǵan.
