Armenııa men Iran shekara aımaǵynda ınfraqurylymdy damytýǵa kelisti

ASTANA. KAZINFORM – Armenııa men Iran shekaralas aımaqtaǵy Nordýz beketinde ekinshi kópir qurylysyn júrgizetin bolyp kelisti. Bul týraly Irannyń Jol jáne qala qurylysy mınıstri Narzane Sadeg málim etti, dep habarlaıdy Armenia Today.

Mınıstrdiń sózinshe, taraptar jańa kópirmen qatar qoldanystaǵy ótkeldi jańartýdy jáne zamanýı termınaldar ornatyp, júk tasymaldary úshin tarıfterdi qaıta qaraýdy kózdep otyr.

Mınıstrdiń aıtýynsha, bul sharalar júrgizýshilerdiń qozǵalysyn jeńildetip, aldaǵy aılarda «tranzıt paketin» daıyndaý isin aıaqtaýǵa múmkindik beredi.

Sonymen qatar Parsy shyǵanaǵyn Qara teńizben jalǵaýǵa baǵyttalǵan strategııalyq jobany júzege asyrý jumystary júrip jatyr. Naqtyraq aıtqanda, temirjol Irannyń Djýlf qalasyna deıin jetkizildi. Al ony Nahıchevan arqyly Erevan baǵytynda jalǵastyrý maquldandy. Atalǵan baǵyt Iran, Armenııa, Ázerbaıjan men Eýropa elderi arasyndaǵy júk tasymalynda mańyzdy ról atqarady degen úmit bar.

Atalǵandarmen qosa, taraptar áýe baǵyttary boıynsha memorandýmǵa qol qoıýdy josparlap otyr. Yntymaqtastyqtyń sheshýshi baǵyttarynyń biri ońtústik Iran porttarynyń qýatyn Parsy shyǵanaǵy men Oman teńizi akvatorııasynda paıdalaný bolyp otyr. Bul óz kezeginde Armenııadan Eýropaǵa jáne Shyǵys Azııa elderine júk tasymaldaýǵa qosymsha jol ashady.

Islam Respýblıkasynyń prezıdenti Masýd Pezeshkıannyń Erevanǵa resmı sapary aıasynda Iran men Armenııa túrli salalarda yntymaqtastyq boıynsha 10 qujatqa qol qoıdy.

Armenııa premer-mınıstri Nıkol Pashınıannyń málimdeýinshe, Erevan men Tegeran eki eldiń yntymaqtastyǵyn strategııalyq seriktestik deńgeıine jetkizbek.

Onyń sózinshe, Armenııa men Iran ekijaqty taýar aınalymyn 3 mlrd dollarǵa jetkizýdi kózdep otyr. Qazirgi tańda bul kórsetkish 1 mlrd dollardy qurap otyr.

Osyǵan deıin Iran men Tájikstanniń strategııalyq áriptestikti tereńdetýge keliskeni týraly jazdyq.