Armenııa men Iran óńirdegi kólik dálizderin qalpyna keltirý máselesin talqylady

EREVAN. KAZINFORM — Armenııanyń premer-mınıstri Nıkol Pashınıan Erevanǵa jumys saparymen kelgen Irannyń vıtse-prezıdenti Seıed Hamıd Pýrmohammadımen kezdesti, dep habarlaıdy Kazinform agenttiginiń Erevandaǵy menshikti tilshisi.

Armenııa men Iran óńirdegi kólik dálizderin qalpyna keltirý máselesin talqylady
Foto: primeminister.am

Kezdesýde Nıkol Pashınıan Seıed Hamıd Pýrmohammadıdiń saparyn joǵary baǵalap, Armenııa men Iran arasyndaǵy úkimetaralyq komıssııa jumysynyń tıimdiligin arttyrý mańyzdy ekenin atap ótti. Onyń aıtýynsha, eki el túrli salada birlesken jobalardy tabysty júzege asyryp keledi. Bul óz kezeginde ekijaqty qarym-qatynastardyń damýyna jáne nyǵaıýyna yqpal etedi.

Seıed Hamıd Pýrmohammadı Iran prezıdenti Masýd Pezeshkıannyń Nıkol Pashınıanǵa joldaǵan sálemin jetkizip, Armenııamen yqpaldastyqty odan ári keńeıtýge múddeli ekenin aıtty.

Taraptar kezdesýde Armenııa men Iran shekarasyndaǵy ınfraqurylymdy damytý, jol qurylysy salasyndaǵy birlesken jobalardy júzege asyrý, energetıka, aýyl sharýashylyǵy jáne ózge de baǵyttardaǵy yntymaqtastyq máselelerin talqylady.

Armenııa men Iran óńirdegi kólik dálizderin qalpyna keltirý máselesin talqylady
Foto: primeminister.am

Munymen birge olar búginde jabyq turǵan óńirdegi saýda dálizderin ashý jáne ózara kólik baılanysyn qalpyna keltirý múmkindikteri boıynsha pikir almasty.

Buǵan deıin habarlaǵanymyzdaı, Armenııa men Grýzııa shekarany delımıtatsııalaý kelissózderin qaıta jandandyrdy.

Eske salaıyq, taıaýda Dúnıejúzilik armıandar sammıtinde sóz sóılegen premer-mınıstr Nıkol Pashınıan Armenııa men Túrkııa taıaý jyldary dıplomatııalyq qarym-qatynas ornatatýǵa nıetti ekenin aıtty.