Armenııa men EO eki jyl ishinde vızasyz rejım engizýi múmkin
ASTANA. KAZINFORM – Nıkol Pashınıan Erevan Eýropalyq odaqpen vızalyq rejımdi yryqtandyrý úderisin eki jyl ishinde aıaqtaýǵa úmittenetinin málimdedi, dep habarlaıdy «Novostı-Armenııa» agenttigi.
Onyń aıtýynsha, Armenııa men EO arasyndaǵy kelissózder belsendi túrde ilgerilep jatyr. Sonymen qatar armıan azamattarynyń Eýropaǵa sapary rekordtyq deńgeıge jetken.
– Bizden «Eýroodaqpen qarym-qatynastaryńyz óte jaqsy, vızalyq máseleni sheshe almaısyzdar ma?» dep suraıdy. Munyń sebebin bilesizder me? Óıtkeni 2018–2025 jyldary Armenııadan EO elderine baratyn azamattar sany 500 paıyzǵa ósti, – dedi premer-mınıstr.
Pashınıannyń aıtýynsha, qazir EO elderiniń dıplomatııalyq ókildikteri ótinishterdiń úlken aǵynyn óńdeýge úlgermeı jatyr.
Sonymen birge armıan úkimetiniń basshysy kelissózder aıaqtalǵannan keıin Armenııa azamattarynyń Eýropaǵa sapary aıtarlyqtaı jeńildeıtinin ańǵartty.
– Ol kezde Larnakaǵa barý úshin tek tólqujatty umytpasańyz bolǵany, al bılet baǵasy, ózderińiz biletindeı, 2 eýro turady, – dedi ol.
Armenııa men Eýropalyq odaq arasyndaǵy vızalyq lıberalızatsııa jónindegi resmı dıalog 2024 jyldyń qyrkúıeginde bastaldy.
2025 jyldyń kókteminde respýblıkaǵa eldiń vızasyz rejımge daıyndyq deńgeıin baǵalaý úshin EO sarapshylar mıssııalary kelgen edi.
2025 jylǵy 5 qarashada Eýropalyq komıssııa armıan tarabyna vızalyq rejımdi yryqtandyrý jónindegi is-qımyl josparyn tapsyrdy.
Arpıne Sarkısıanniń málimdeýinshe, EO talaptaryn oryndaý el bıligi júrgizip jatqan ishki reformalarmen sáıkes keledi.
Vızalyq lıberalızatsııa jospary 74 mindetti tarmaqtan turady. Olar tórt negizgi baǵytqa bólingen:
- bıometrııalyq tólqujattar men ID-kartalardy engizý;
- shekara baqylaýy men kóshi-qon júıesin kúsheıtý;
- jemqorlyqpen, adam saýdasymen jáne esirtki trafıgimen kúres;
- adam quqyqtaryn qorǵaý jáne quqyqtyq tetikterdi jetildirý.
Eske sala ketsek, Armenııa halyqaralyq kezdesýler qorytyndysy boıynsha EO-men baılanysyn kúsheıtpek.
Sondaı-aq Armenııa Túrkııa arqyly Eýropaǵa temirjol qatynasyn ashqanyn jazdyq.
