Armenııa men Ázerbaıjan Taýly Qarabaqta atysty toqtatý týraly kelisimge keldi
MÁSKEÝ. TASS-QazAqparat – Armenııa men Ázerbaıjan Máskeýde ótken konsýltatsııalardyń qorytyndysy boıynsha málimdeme qabyldady, taraptar tutqyndardy, sondaı-aq qaza tapqandardyń máıitterin almasý úshin gýmanıtarlyq maqsatta 10 qazanda saǵat 12:00-den bastap atysty toqtatý týraly ýaǵdalasty, dep habarlaıdy QazAqparat TASS agenttigine silteme jasap.
Reseı Federatsııasynyń Prezıdenti V.V. Pýtınniń úndeýine jaýap retinde jáne Reseı Federatsııasynyń Prezıdenti V.V.Pýtınniń, Ázerbaıjan Respýblıkasynyń Prezıdenti I.G. Álıevtiń jáne Armenııa Respýblıkasynyń Premer-Mınıstri N.V. Pashınıannyń ýaǵdalastyqtaryna sáıkes taraptar mynadaı qadamdar týraly kelisti:
1. 2020 jylǵy 10 qazanda saǵat 12:00-den bastap áskerı tutqyndardy jáne basqa da ustalǵan adamdar men deldaldyq kezinde qaza tapqan adamdardyń máıitterin almasý úshin jáne Halyqaralyq Qyzyl Krest komıtetiniń krıterıılerine sáıkes gýmanıtarlyq maqsatta atysty toqtatý týraly sheshim jarııalanady.
2. Atysty toqtatý rejıminiń naqty parametrleri qosymsha kelisiledi.
3. Ázerbaıjan Respýblıkasy men Armenııa Respýblıkasy EQYU-nyń Mınsk tobynyń teń tóraǵalarynyń deldaldyǵy arqyly bitimgershiliktiń bazalyq qaǵıdattary negizinde beıbit kelisimge jedel qol jetkizý maqsatynda sýbstantıvtik kelissózderge kirisedi.
4. Taraptar kelissózder protsesi formatynyń ózgermeıtinin rastaıdy.
Buǵan deıin habarlanǵandaı, Reseı prezıdenti Vladımır Pýtın Armenııa men Ázerbaıjannyń SІM basshylaryn Máskeýge Taýly Qarabaq qaqtyǵysy kezinde qaza tapqandardyń máıitteri men tutqyndardy almasý máseleleri boıynsha keńesýge shaqyrdy. Reseı, Ázerbaıjan jáne Armenııa syrtqy saıası vedomstvolary basshylarynyń kelissózderi 10 saǵattan astam ýaqytqa sozyldy.
