Armenııa men Ázerbaıjan beıbit retteý týraly birlesken deklaratsııaǵa qol qoıdy
ASTANA. KAZINFORM — Ázerbaıjan prezıdenti, Armenııa premer-mınıstri jáne AQSh prezıdenti Vashıngtonda Baký men Erevan arasyndaǵy qatynastardy beıbit jolmen retteý týraly birlesken deklaratsııaǵa qol qoıdy, dep habarlaıdy Kazinform agenttiginiń menshikti tilshisi.
Úshjaqty kezdesýdiń qorytyndysy boıynsha AQSh prezıdenti Donald Tramp qol jetkizilgen kelisimder aıasynda Ázerbaıjan men Armenııa jaýyngerlik áreketterdi birjola toqtatýǵa jáne bir-biriniń egemendigi men aýmaqtyq tutastyǵyn qurmetteýge mindettengenin málimdedi.
— Osy kelisimniń arqasynda biz beıbitshilikke qol jetkizdik. Biz jańa ǵana Ovaldy kabınetten shyqtyq, onda aýqymdy qujattar men kelisimniń asa mańyzdy erejelerine qol qoıyldy, — dedi Tramp.
Taraptar sondaı-aq AQSh-pen birlesip TRIPP (Trump Route for International Peace and Prosperity — «Halyqaralyq beıbitshilik pen órkendeýge arnalǵan Tramp baǵyty») ınfraqurylymdyq jobasyn júzege asyrýǵa kirisýge mindetteldi. Armenııa premer-mınıstriniń aıtýynsha, bul bastama óńirdi turaqty damý úshin ashyp, barlyq qatysýshy taraptar úshin uzaq merzimdi paıda ákeletin negiz qalyptastyrady.
Armenııa úkimetiniń basshysy ásirese kólik qatynastarynyń ashylýyna qatysty kelisimge erekshe nazar aýdardy. Ol qujat ár eldiń egemendigi, aýmaqtyq tutastyǵy jáne ıýrısdıktsııasy qaǵıdattaryna negizdelgenin atap ótti. Qujat talaptaryna sáıkes, AQSh bul jobany 99 jylǵa júzege asyrýǵa eksklıýzıvti quqyqqa ıe bolady.
Buǵan qosa, kezdesýge qatysýshylar Mınsk úderisin aıaqtap, onyń qurylymdyq bólimshelerin jabýǵa shaqyryp, EQYU-ǵa birlesken úndeý qabyldady.
Tramp sondaı-aq AQSh Ázerbaıjanmen áskerı yntymaqtastyqqa qoıylǵan shekteýlerdi, sonyń ishinde Vashıngton men Bakýdiń ózara is-qımylyn shekteıtin «Bostandyqty qoldaý týraly aktiniń» 907-shi túzetýin alyp tastaıtynyn málimdedi.
Buǵan deıin Armenııa, Ázerbaıjan jáne AQSh-tyń Vashıngtonda úshjaqty kezdesýge daıyndalyp jatqany habarlanǵan bolatyn.