Armenııa men Ázerbaıjan beıbit kelisimge qol qoıýǵa nıetti

Armenııa SІM basshysy Ararat Mırzoıan AQSh memlekettik hatshysy Entonı Blınkenniń shaqyrýymen Vashıngtonda óziniń ázerbaıjandyq áriptesi Djeıhýn Baıramovpen kezdesý ótkizip, eki el arasynda beıbit kelisim ornatýǵa daıyn ekenin málim etti, dep habarlaıdy Kazinform agenttiginiń menshikti tilshisi.

Ararat Mırzoıan AQSh Memlekettik departamentiniń Kavkaz boıynsha keńesshisi Lýıs Bonomen kezdesýde osyǵan kelisetinin aıtty.

- Taraptar óńirlik qaýipsizdik pen turaqtylyqqa baılanysty máselelerdi qozǵady. Armenııa Ázerbaıjannyń syrtqy ister mınıstrimen Vashıngtonda kezdesý ótkizý týraly AQSh usynysyna oń kózqaras tanytty, - delingen habarlamada.

Jaqynda Ázerbaıjan Respýblıkasynyń Prezıdent Ákimshiligi men Armenııa Respýblıkasy Premer-mınıstriniń apparaty ortaq málimdeme jasap, eki el de qarym-qatynasyn rettep, egemendik pen aýmaqtaq tutastyq prıntsıpterine negizdelgen beıbit kelisimge qol jetkizýge nıetti ekenin rastaǵanyn aıtty. Kelisim aıasynda Baký 32 armenııalyq áskerı qyzmetshini, al Erevan eki ázerbaıjandyq áskerı qyzmetshini bosatady. Taraptar eki el arasyndaǵy senimdi arttyrýǵa kúsh salady. Bul – Ońtústik Kavkaz óńirine oń áser etetini sózsiz.

Kelissózder nátıjesinde eki el arasyndaǵy senimdi nyǵaıtý úshin negizgi úsh baǵytty qolǵa alý týraly kelisimge qol jetkizilgen.

Keshe Ázerbaıjan SІM Armenııany beıbit kelisim ornatý úshin kelissózdi jańǵyrtýǵa shaqyrdy.