Armenııa men Ázerbaıjan arasynda beıbitshilik ornady - Pashınıan

ASTANA.KAZINFORM - Vashıngtonda qol qoıylǵan úshjaqty kelisim Armenııa men Ázerbaıjan arasynda beıbitshilik ornady dep aıtýǵa negiz beredi. Bul týraly baspasóz máslıhatynda Armenııa premer-mınıstri Nıkol Pashınıan aıtty, dep habarlaıdy Kazinform tilshisi.

-Búgin bolǵan oqıǵa - tarıhı oqıǵa. Búgin beıbitshilik ornady jáne ol elderimizdiń egemendigi men aýmaqtyq tutastyǵy aıasynda ornady dep aıta alamyz,- dedi Pashınıan.

Premer-Mınıstr aımaqtyq kommýnıkatsııalardy ashý aýmaqtyq tutastyq, egemendik, ıýrısdıktsııa jáne ózara quqyq qaǵıdattary negizinde múmkin bolǵanyn atap ótti. Bul Ázerbaıjannyń negizgi aýmaǵy men Nahchyvan Avtonomııalyq Respýblıkasy arasyndaǵy kedergisiz qatynasqa, sondaı-aq eki taraptyń barlyq kólik baǵyttaryn, sonyń ishinde temir joldy teń sharttarda paıdalaný quqyǵyna qatysty.

Aıta ketý kerek, úshjaqty kezdesý AQSh-tyń aralasýymen uıymdastyryldy. Deklaratsııaǵa qol qoıý rásiminde Ázerbaıjan prezıdenti Ilham Álıev Armenııa premer-mınıstrine Donald Trampqa Nobel beıbitshilik syılyǵyn berý bastamasymen Nobel komıtetine ortaq úndeý joldaýdy usyndy.

Buǵan deıin Armenııa men Ázerbaıjannyń beıbit retteý týraly birlesken deklaratsııa qabyldaǵany habarlanǵan bolatyn.