Armenııa men AQSh TRIPP jobasy boıynsha alǵashqy qujatqa jaqyn arada qol qoıady
ASTANA. KAZINFORM – Armenııa men AQSh ınfraqurylymdyq TRIPP jobasyn iske asyrýǵa qatysty alǵashqy birlesken qujatqa aldaǵy kúnderi nemese aptada qol qoıady. Bul týraly Armenııanyń syrtqy ister mınıstri Ararat Mırzoıan 2025 jylǵy syrtqy saıası qyzmettiń qorytyndylaryna arnalǵan efırde málimdedi, dep habarlaıdy Kazinform menshikti tilshisi.
Mınıstrdiń aıtýynsha, jobanyń praktıkalyq kezeńi, sonyń ishinde qurylys jumystarynyń bastalýy 2026 jyldyń ekinshi jartysynda josparlanyp otyr. Sonymen qatar taraptar óńirlik kommýnıkatsııalardy ashý máselesinde memleketterdiń egemendigi, aýmaqtyq tutastyǵy men shekaralardyń myzǵymastyǵy sózsiz saqtalýy tıis degen ustanymdy rastaǵan.
Ararat Mırzoıannyń atap ótýinshe, jobanyń alǵashqy iske asyrylatyn quramdas bóligi retinde temirjol qatynasy qarastyrylǵan. Bul Armenııanyń halyqaralyq naryqtarǵa turaqty shyǵýyn qamtamasyz etip, eksport, ımport jáne tranzıttik tasymal múmkindikterin keńeıtýge baǵyttalǵan. Atalǵan baǵyt tek óńir elderi úshin ǵana emes, Ortalyq Azııa men Eýropa memleketterin qosa alǵanda, úshinshi elder úshin de mańyzdy bolmaq.
Sondaı-aq mınıstr amerıkalyq tarappen jobanyń quqyqtyq negizderin kelisý, mindetterdi bólý jáne tehnıkalyq parametrlerdi naqtylaý boıynsha belsendi jumys jalǵasyp jatqanyn habarlady.
Buǵan deıin Armenııanyń premer-mınıstri Nıkol Pashınıan parlament otyrysynda TRIPP kólik baǵytynyń qurylysy el aýmaǵynda 2026 jyldyń ekinshi jartysynda bastalýy múmkin ekenin aıtqan edi.
Ol sondaı-aq atalǵan kólik dálizin jalǵa berý nusqalary da qarastyrylyp jatqanyn málimdegen bolatyn.