Armenııa men AQSh TRIPP jobasy aıasynda birlesken kompanııa qurady
ASTANA. KAZINFORM — Armenııa men AQSh eldiń egemendigin tolyq saqtaı otyryp Armenııa ishinde tranzıttik baǵyttardy júzege asyrý úshin TRIPP Development Company kompanııasyn qurýdy josparlap otyr, dep habarlaıdy Kazinform menshikti tilshisi.
Bul týraly Armenııa Syrtqy ister mınıstrliginiń Armenııa men AQSh arasynda «Tramptyń halyqaralyq beıbitshilik pen órkendeý baǵyty» (TRIPP) jobasyn iske asyrý boıynsha negizdemelik kelisim týraly jarııalaǵan birlesken málimdeme mátininde aıtylǵan.
Qujatqa sáıkes, Armenııa TRIPP jobasyn damytýǵa jaýapty bolatyn TRIPP Development Company-di qurýdy ruqsat etip, oǵan kómek kórsetýge nıetti. Kompanııaǵa bastapqy 49 jyl merzimge qurylys júrgizý quqyǵy beriledi dep josparlanyp otyr. Bul rette Armenııa AQSh-qa 74% kólemindegi úlesti usynyp, ózine qatysýdyń 26%-yn qaldyrmaq. Osy merzim aıaqtalǵan soń seriktestik taǵy 50 jylǵa uzartylýy múmkin, sol kezde Armenııa úkimetine qosymsha menshik úlesi berilip, bul oǵan kompanııadaǵy úlesin 49%-ǵa deıin arttyrýǵa múmkindik beredi.
TRIPP Development Company bastama aıasynda temirjol jáne avtomobıl joldary jobalaryn tikeleı júzege asyrady, sondaı-aq TRIPP baǵdarlamasynyń jeke komponentteri úshin enshiles kompanııalar nemese mamandandyrylǵan qurylymdar qurady dep kútilip otyr. Bul rette Erevan ulttyq qaýipsizdik, quqyq qorǵaý qyzmeti, sondaı-aq TRIPP aımaǵy arqyly saýda men tranzıtti kedendik rásimdeýdi tolyq baqylaýda ustaıdy.
Budan basqa, Armenııa kompanııaǵa belgilengen baǵyttar boıynsha mýltımodaldy tranzıttik ınfraqurylymdy josparlaý, jobalaý, damytý, salý, paıdalaný jáne kútip ustaýǵa eksklıýzıvti quqyqtar bermek. Bul ókilettikterge jeke ınfraqurylymdyq jobalar úshin arnaıy maqsattaǵy uıymdardy qurý, qurylys kompanııalary, operatorlar jáne qyzmet kórsetýshilermen kelisimsharttar jasasý, ınfraqurylymdyq qyzmetten kiristerdi alý jáne jınaý, sondaı-aq TRIPP baǵytyn ıntegratsııalanǵan kólik júıesiniń bóligi retinde basqarý kiredi.
Qurylys quqyqtary temirjol, avtomobıl joldary, energetıka, tsıfrlyq jáne basqa da qoldaýshy ınfraqurylymdy qamtýy múmkin.
Buǵan deıin Armenııa «Tramp baǵyty» jobasy qurylysynyń bastalý merzimin jarııalaǵanyn habarladyq. Ol 2026 jylǵa belgilengen.