Armenııa, Qyrǵyzstan eliniń nómiri bar kólikterdi onlaın ári tegin túrde tirkeý júıesi iske qosylady
«Kún saıyn ishki ister organdary sheteldik tirkeýde turǵan kólik quraldary ıelerine qatysty júzdegen jol-kólik oqıǵasyn tirkeıdi. Mundaı jol apattarynyń arty ólimge de aparyp jatady. 2018 jyly ǵana sheteldik tirkeýdegi kólikterge qatysty 42 myń jol-kólik oqıǵasy tirkelse, osy jyldyń basynan beri 50 myń fakti oryn aldy», - delingen habarlamada.
Mınıstrliktiń habarlaýynsha, búgin ǵana Aqtóbe oblysynda osyǵan uqsas jaǵdaı bolǵan. Naqtyraq aıtqanda, Armenııa memlekettiń nómirli mınıven júrgizýshisi kólik tizginine ıe bola almaı, jol shetine aýnap ketken. Apat saldarynan bir adam kóz jumyp, jeti adam ártúrli jaraqat alǵan. Júrgizýshiniń ózin jedel járdem qyzmetkerleri aýrýhanaǵa jetkizgen.
«Sol sekildi Almaty oblysyndaǵy «Almaty-Bishkek» avtojolynda Qyrǵyz Respýblıkasynda tirkelgen kólikti aıdap kele jatqan júrgizýshi joldyń qarama-qarsy betine shyǵyp ketip, qarsy kelgen kólikpen betpe-bet soqtyǵysqan. Saldarynan úsh adam qaıtys bolyp, jeteýi aýrýhanaǵa jetkizilgen», - dep habarlaıdy mınıstrlikten.
ІІM-niń aqparattyq bazasynda ol kólikter týraly málimet joq bolǵandyqtan, ókinishke qaraı jol apatynyń aıypkerin jedel jaýapkershilikke tartý múmkin bolmaı jatady. Osyǵan baılanysty, bizdiń elde paıdalaný merzimi uzartylǵan jaǵdaıda EAEO-ǵa múshe memleketterde tirkelgen kólikterdi mindetti ýaqytsha tirkeý máselesi jolǵa qoıylmaq.
«Bul jerde atalǵan kólik quraldaryn birjolata paıdalanýǵa tyıym salý nemese qandaı da bir shekteý qoıý, salyq tóletý týraly aıtylyp turǵan joq. Másele ýaqytsha tirkeýge baılanysty. Avtokólik ıeleri kólikterin onlaın túrde tegin tirkete alady», - delingen habarlamada.
Osylaısha, sheteldik kólikterdi tirkeý arqyly jol-kólik oqıǵasy bolǵan jaǵdaıda avtomatty júıe arqyly tanýǵa bolady. Odan ary ereje nemese zań buzýshyny ákimshilik jáne qylmystyq jaýapkershilikke tartýǵa jol ashylady.
