Armenııa kórshiles eldermen shekarany delımıtatsııalaýdy aıaqtaýdy josparlap otyr
ASTANA. KAZINFORM – Armenııa Ázerbaıjan jáne Grýzııamen memlekettik shekarany delımıtatsııalaý jumystaryn jalǵastyrady. Bul týraly Kazinform agenttiginiń menshikti tilshisi Armenpress agenttigine silteme jasap habarlady.
Bul jóninde Ulttyq qaýipsizdik qyzmetiniń Shekara áskerleri kúnine oraı Armenııanyń premer-mınıstri Nıkol Pashınıan málimdedi.
— Búginde sizderdiń qyzmetterińiz Armenııa Respýblıkasynyń tarıhyndaǵy erekshe kezeńde ótip jatyr. Táýelsizdik alǵannan beri alǵash ret eldegi barlyq shekara beketteri tolyq baqylaýǵa alynyp, onda Armenııanyń Shekara áskerleri qyzmet atqaryp jatyr. Taǵy bir mańyzdy jańalyq — eki jyldan beri Armenııa men Ázerbaıjan shekarasynda uzyndyǵy 12 shaqyrym bolatyn delımıtatsııalanǵan jáne demarkatsııalanǵan bólik bar. Bul aýmaqta da qyzmetti Armenııanyń Shekara áskerleri atqarady. Buny da erekshe atap ótý kerek. Sonymen qatar, dál osy 12 shaqyrym Armenııa men Ázerbaıjan arasyndaǵy eki eldiń qarýly kúshteri bronejıletsiz qyzmet etetin jalǵyz shekara bóligi. Olardyń avtomattary oqtalmaǵan, óıtkeni oqtar sómkelerinde saqtalady, — dedi Pashınıan.
Premer-mınıstrdiń aıtýynsha, bul Armenııa men Ázerbaıjan úkimetteri men shekara qyzmetteri arasyndaǵy kelisimniń nátıjesinde múmkin bolǵan.
— Bul jaǵdaı shekarashylardyń beıbitshiliktiń belgisi ekenin kórsetedi. Ádette shekarashylar turǵan jerde turaqtylyq saqtalady. Biz Armenııa Respýblıkasynyń barlyq shekarasy shekara qyzmetiniń jaýapkershiliginde bolýyn qalaımyz. Biz osy baǵytta jumys istep kelemiz. Jaqyn ýaqytta Armenııa men Ázerbaıjan arasyndaǵy shekarany delımıtatsııalaý protsesin jalǵastyryp, ony qajet ýaqytynda aıaqtaımyz. Sonymen qatar Grýzııamen shekarany delımıtatsııalaýdy tolyq aıaqtaý máselesi de kún tártibinde tur. Bul baǵytta grýzııalyq áriptestermen kelisimge qol jetkizdik. Nátıjesinde Armenııanyń shekaralaryn delımıtatsııalaý men demarkatsııalaý tolyq aıaqtalyp, memleket halyqaralyq deńgeıde moıyndalǵan aýmaǵyn damytýǵa senimdi túrde den qoıa alady, — dedi Nıkol Pashınıan.
Buǵan deıin Qazaqstan úkimeti Armenııamen áskerı barlaý salasyndaǵy yntymaqtastyq týraly kelisim jobasyn maquldaǵany habarlanǵan edi.
Osyǵan deıin Ázerbaıjan men Armenııa qaqtyǵys dáýirin aıaqtaý týraly sheshim qabyldaǵany týraly jazǵan edik.
