Armenııa Qazaqstannyń sý resýrstaryn tıimdi basqarý baǵytyndaǵy bastamalaryn qoldaıdy
ASTANA. KAZINFORM – Jahandyq jylynýdyń saldary atalǵan elde qazirdiń ózinde bilinip otyr. Bul jóninde Armenııa prezıdenti Vaagn Hachatrıan Óńirlik ekologııalyq sammıtte málimdedi.
– Astanadaǵy ekologııalyq sammıtke qatysý – mártebe. Qazaqstan Prezıdenti Qasym-Jomart Toqaevqa, Qazaqstan Úkimeti men halqyna osy dástúrli ári mańyzdy is-sharany joǵary deńgeıde uıymdastyrǵany úshin shyn júrekten alǵys aıtamyn. Qazaqstannyń aımaqtyq jáne jahandyq ekologııalyq máselelerdi sheshý úshin halyqaralyq yntymaqtastyqty nyǵaıtýǵa degen talpynysyn joǵary baǵalaımyz, - dedi ol.
Armenııa prezıdentiniń sózinshe, bul forým úkimetterdi, ǵylymı qaýymdastyqty, azamattyq qoǵamdy ortaq maqsatqa biriktiredi.
Sondaı-aq Armenııada qazirdiń ózinde jahandyq jylynýdyń saldary baıqalady.
– Keıingi ondaǵan jylda álemdegi gaz shyǵaryndylarynyń 0,02%-y ǵana bizdiń elimizge tıesili. Soǵan qaramastan, Armenııada aýa temperatýrasy 1 gradýsqa jylydy. Bul muzdyqtardyń erýi, sý resýrstarynyń azaıýy t.b. ekologııalyq máselelerdi týyndatyp jatyr. Saldarynan aýyl sharýashylyǵyna zaqym keledi, jalpy halyq turmysyna keri áser etedi, - dedi ol.
Vaagn Hachatrıannyń aıtýynsha, Armenııa Qazaqstannyń sý resýrstaryn tıimdi basqarý baǵytyndaǵy bastamalaryn qoldaıdy. Aldaǵy ýaqytta atalǵan memleket mundaı jıyndarǵa belsendi qatysýǵa daıyn.
Aıta keteıik, buǵan deıin ekologııa Ortalyq Azııany biriktiretin faktor ekenin jazǵanbyz.
