Armenııa Qazaqstannyń bilim berý júıesimen jete tanysqysy keledi - Vaagn Hachatýrıan
ASTANA. KAZINFORM – Armenııa Qazaqstannyń bilim berý júıesimen jete tanysqysy keledi. Bul týraly búgin Memlekettik basqarý akademııasy tyńdaýshylaryna dáris oqyǵan Armenııa Prezıdenti Vaagn Hachatýrıan aıtty.
«Búginde biz bilim berýge 287 mlrd armıan dramyn jumsaımyz. Bul 2018 jylǵy kórsetkishten 2 esege kóp. Bizdi jańa bilim berý jobalary, baǵdarlamalary kútip tur. Biz úshin bul saladaǵy óte jaqsy úlgi – bilim berýge mol qarajat quıyp, pedagogtarǵa laıyqty jalaqy tólep otyrǵan Qazaqstan. Qazirgi ýaqytta Qazaqstan sııaqty bizde muǵalimderdiń róline basa mán berip otyrmyz. Búgingi kezdesýimizge Bilim, ǵylym, sport jáne mádenıet mınıstri qatysyp otyr. Keshe Prezıdent Qasym-Jomart Toqaev myrzamen sizderdiń bilim berý júıelerińizben jaqynyraq tanysý, jańa bilim alý úshin bizdiń taǵy bir saparymyzdyń múmkindikterin talqyladyq», - dedi Armııan Prezıdenti.
Sonymen qatar ol Armenııanyń bilim berý salasyndaǵy josparymen bólisti.
«500 jańa mektep pen balabaqsha salý jáne jóndeý josparymyzda bar. Sondaı-aq Akademııalyq qalalyq qurýdy da kózdep otyrmyz. Qazirgi ýaqytta Armenııa Úkimeti ony salý ıdeıasyn júzege asyrý, bilim sapasyn kóterý jáne Armenııany bilim alý múmkindikteri turǵysynda tartymdy jasaý úshin barlyq kúsh-jigerin jumsap jatyr. Ondaǵan jyldar boıy bizde bul salaǵa ınvestıtsııa salynǵan joq, sport zaldary, tehnıkalyq múmkindikter bolmady. Sizderdiń bilim berý júıelerińizden kórgenimizdiń bárin óz mektepterimizde engizgimiz keledi», - dep atap ótti Vaagn Hachatýrıan.
Buǵan deıin Armenııa Prezıdenti Vaagn Hachatýrıannyń «Armıandyq «beıbitshilik tiregi»: Ońtústik Kavkazdyń ulttyq artyqshylyǵy jáne turaqty damýynyń kepili» taqyrybynda dáris oqyǵanyn jazǵan edik.
Keshe Aqordada Armenııa Prezıdenti Vaagn Hachatýrıandy saltanatty qarsy alý rásimi ótti.
Sonymen qatar eki el basshylary Qalıbek Qýanyshbaev atyndaǵy Qazaq ulttyq mýzykalyq drama teatrynda Armenııanyń mádenıet kúnderine oraı uıymdastyrylǵan saltanatty kontsertke bardy.
