Armenııa qandaı jaǵdaıda Ázerbaıjanmen beıbit kelisimge keletinin aıtty

EREVAN. QazAqparat – Armenııa men Ázerbaıjan bir-biriniń aýmaqtyq tutastyǵyn moıyndaǵan jaǵdaıda beıbit kelisimge kelýi múmkin. Armenııa Ázerbaıjannyń aýmaqtyq tutastyǵyn tolyq moıyndaıdy jáne KSRO kezindegi kartany negizge alýdy usynady. Bul týraly Parlamentte Armenııa Premer-mınıstri Nıkol Pashınıan málimdedi, dep habarlaıdy QazAqparattyń menshikti tilshisi.

«Eger eki el ekiushty jáne quıtyrqy oısyz bir-biriniń aýmaqtyq tutastyǵyn moıyndap, búgin de, keıin de aýmaqqa qatysty narazy bolmaıtynyna mindettelse Armenııa men Ázerbaıjan beıbit kelisimge qol jetkizýi múmkin. Qazir men Armenııa Respýblıkasy Ázerbaıjannyń aýmaqtyq tutastyǵyn tolyq moıyndaıtynyn rastaǵym keledi jáne Ázerbaıjan da Armıan KSR aýmaǵyn Armenııa Respýblıkasyna tıesili dep moıyndaǵanyn kútemiz», - dep málimdedi Nıkol Pashınıan 2022 jylǵy El úkimetiniń esebin usyna otyryp.

Onyń sózinshe, fakt júzinde taraptar bul týraly 2022 jyldyń 6 qazanynda Pragada jáne 2022 jyldyń 31 qazanynda Sochıde kelisip, kelisim jarııa málimdemede tirkelgen bolatyn.

«Soǵan qaramastan Erevannan da, Bakýden de qarsy tarapty kelisimdi oryndamady dep aıyptaıtyn resmı málimdeme jasaldy. Sondaı-aq Armenııa beıbit kelisim kezinde Ázerbaıjannyń aýmaqtyq tutastyǵyn moıyndaýdan bas tartty nemese bas tartady degen pikirler – jalǵan, biz ony dáleldeı alamyz. Biz ózimiz beıbitshilik týraly kelisimge eki eldiń aýmaqtyq tutastyǵyn moıyndaý negizi retinde KSRO daıyndap, bekitken Armıan men Ázerbaıjan KSR kartasyn engizýdi usynǵanbyz», - dep atap ótti Nıkol Pashınıan .