Armenııa halqynyń úshten biri Erevanda turady
ASTANA. KAZINFORM – Armenııa Respýblıkasy Statıstıka komıtetiniń málimetteri boıynsha, 2025 jyldyń 1 shildesinde, eldiń turaqty halqynyń sany 3 mln 84 myń adam boldy, dep habarlaıdy Kazinfrom agenttiginiń menshikti tilshisi.
Jyldyq ósimmen alǵanda Armenııa halqynyń sany 27 myń adamǵa kóbeıdi. El halqynyń 1 mln 974 myńy qalada turady, 1 mln 109 myń adam aýyldyq jerlerge qonystanǵan.
Turǵyndar eń kóp shoǵyrlanǵan jer – el astanasy Erevan. Onda 1 mln 143 myń adam turady. Bul el halqynyń 37,1 paıyzy.
Ákimshilik aýdandardyń ishinde halyq tyǵyz ornalasqan jer 150,3 myń halqy bar Malatııa-Sebastııa bolyp qalyp otyr, al halyq eń az ornalasqan jer – 11,2 myń adamdyq Nýbarashen eldi mekeni.
Respýblıka óńirleriniń ishinde halqy eń kóp oblys – Kotaık (294,9 myń), halqy eń azy Vaıots Dzor oblysy bolyp otyr, munda 49,4 myń halyq qonys tepken.
Osyǵan deıin Qazaqstanda halyq sany 20 095 963 adamǵa jetkeni týraly jazdyq.
