Armenııa halyqaralyq kezdesýler qorytyndysy boıynsha EO-men baılanysyn kúsheıtpek
ASTANA. KAZINFORM — Armenııa men Frantsııa strategııalyq áriptestik ornatý týraly deklaratsııaǵa qol qoıdy, dep jazdy Kazinform agenttiginiń menshikti tilshisi.
Qujatqa Armenııa Respýblıkasynyń premer-mınıstri Nıkol Pashınıan men memlekettik saparmen Erevanǵa kelgen Frantsııa prezıdenti Emmanıýel Makron qol qoıdy.
Sapar aıasynda taraptar jasandy ıntellekt, kıberqaýipsizdik jáne jartylaı ótkizgishter salasyndaǵy yntymaqtastyqty damytýǵa baǵyttalǵan birqatar kelisimderge de qol qoıdy. Kelisimder áskerı tehnologııalardy damytý, qorǵanys júıelerin zertteý jáne áskerı kıim-keshek jetkizýdi de qamtıdy.
Sonymen qatar, kólik tikushaqtaryn jetkizý jáne armıan áýe kompanııasyna Airbus A321-200NX úlgisindegi eki ushaqty satý jóninde kelisimge qol jetkizildi. Frantsııanyń Construction jáne Razel-Bec kompanııalarymen jasalǵan jeke kelisim boıynsha Armenııanyń ońtústiginde Bargýshat tonnelin salý kózdelgen.
Memlekettik sapar qorytyndysy boıynsha Frantsııa prezıdenti Armenııa prezıdentiniń jarlyǵymen eki el arasyndaǵy dostyq qatynastardy nyǵaıtý men damytýǵa qosqan jeke úlesi úshin Dańq ordenimen marapattaldy. Óz kezeginde, frantsýz tarapynyń sheshimimen Armenııa prezıdenti men premer-mınıstri Qurmet legıony ordeniniń Úlken krestimen nagradtaldy.
Aıta keteıik, 4–5 mamyr kúnderi Erevanda Frantsııa prezıdentiniń memlekettik saparynan bólek, basqa da iri saıası is-sharalar ótti — Eýropalyq saıası qaýymdastyq forýmy, sondaı-aq Armenııa — Eýropalyq odaq sammıti.
Sammıt qorytyndysy boıynsha Armenııa — EO birlesken deklaratsııasy qabyldanyp, birqatar qujattarǵa qol qoıyldy. Atap aıtqanda, Armenııa Respýblıkasy men Eýropalyq odaq arasynda ózara baılanys jónindegi áriptestik týraly kelisim jasaldy, sondaı-aq Armenııa Іshki ister mınıstrligi men Eýropalyq shekara jáne jaǵalaý kúzeti agenttigi (Frontex) arasynda shekaralardy basqarý salasyndaǵy jedel yntymaqtastyq týraly jumys kelisimi parafırlendi.
Sonymen qatar, Armenııadaǵy EO delegatsııasynyń basshysy Vasılıs Maragos Armenııa Іshki ister mınıstri, EO-men vızalyq rejımdi yryqtandyrý máseleleri boıynsha bas kelissóz júrgizýshi Arpıne Sargsıanǵa Eýropalyq komıssııanyń vızalyq rejımdi yryqtandyrý jónindegi is-qımyl josparyn iske asyrý barysy týraly esebin tabystady. Qujatta barlyq qajetti talaptar oryndalǵan jaǵdaıda tolyq yryqtandyrýǵa qol jetkizýge arnalǵan usynymdar berilgen.
Sammıt aıasynda EO-da, Eýropalyq ekonomıkalyq aımaqta jáne Armenııada tirkelgen kompanııalar úshin Armenııadaǵy ınvestıtsııalyq jobalarǵa ótinim qabyldaý jónindegi shaqyrýdy jarııalaý týraly kelisimge de qol jetkizildi.
