Armenııa EO-ǵa kirý protsesiniń bastalýy týraly zań jobasyn qabyldady

ASTANA. KAZINFORM – Armenııanyń Ulttyq assambleıasy 26 naýryzda «Armenııa Respýblıkasynyń Eýropalyq Odaqqa múshelik protsesiniń bastalýy týraly» zań jobasyn ekinshi oqylymda jáne tolyq kólemde qabyldady, dep habarlaıdy armenpress.

Jobany 64 depýtat qoldap, 7 depýtat qarsy daýys berdi. 

Jobanyń ózgertilgen túpkilikti tujyrymdamasy mynalardy anyqtaıdy:

«Armenııa Respýblıkasy demokratııalyq ınstıtýttardy damytýǵa, qoǵamnyń ál-aýqatyn jaqsartýǵa, eldiń qaýipsizdigin, turaqtylyǵyn jáne zań ústemdigin nyǵaıtýǵa umtyla otyryp Armenııa Respýblıkasynyń Eýropalyq Odaqqa qosylý protsesiniń bastalǵanyn jarııalaıdy».

Zań jobasyn birinshi oqylymda qabyldaý boıynsha daýys berýge oppozıtsııalyq «Aıastan» fraktsııasy qatysqan joq, sebebi ol aldyn ala bul protseske qatyspaıtynyn málimdegen bolatyn. Oppozıtsııalyq «Ar-namysym bar» fraktsııasy zań jobasyna qarsy daýys berdi. Ekinshi oqylymdaǵy daýys berýge «Aıastan» fraktsııasy taǵy da qatysqan joq, al «Ar-namysym bar» fraktsııasy qarsy daýys berdi.

Eýropalyq Odaqqa kirý protsesi týraly zań jobasy Ulttyq jınalysqa «Eýrodaýys» atty azamattyq bastama arqyly usynyldy. Belgilengen merzimde bastama qajetti 50 000 qoldyń ornyna 60 000 qol jınady.

2025 jylǵy 9 qańtarda zań jobasy Armenııa úkimetiniń otyrysynda talqylanyp, maquldandy, sodan keıin Ulttyq jınalysqa qarastyrýǵa jiberildi. 12 aqpanda ótken otyrysta Ulttyq jınalys zań jobasyn birinshi oqylymda qabyldady.

Eske sala ketsek, Armenııa parlamenti Eýropalyq Odaqqa kirý protsesiniń bastalýy týraly zań jobasyn maquldady.