Armenııa elektromobılderdi bajsyz ákelý kvotasyn 20 myńǵa deıin arttyrdy
ASTANA. KAZINFORM – Armenııaǵa elektromobılderdi baj salyǵynsyz ımporttaýǵa qosymsha 5 myń kólikke kvota bólindi. Osylaısha 2026 jylǵa arnalǵan jalpy kvota 20 myń elektromobılge jetti. Bul týraly Armenpress habarlaıdy.
Eýrazııalyq ekonomıkalyq komıssııa keńesiniń sheshimimen Armenııaǵa 2026 jyly elektromobılderdi 0 paıyzdyq kedendik baj mólsherlemesimen ákelýge múmkindik beretin qosymsha 5 myń kólikke kvota berildi.
Bul týraly Armenııanyń Ekonomıka mınıstri Gevorg Papoıan málimdedi.
Onyń aıtýynsha, qosymsha 5 myń kólikke arnalǵan kvotany bólý tártibi jáne basqa da málimetter jaqyn arada jarııalanady.
Mınıstrdiń málimetinshe, dılerler men jeke tulǵalar úshin shamamen 1,9 myń elektromobılge kvota qalǵan.
-Osy kórsetkishke taǵy 5 myń kólik qosylady. Nátıjesinde bıyl elektromobılderge arnalǵan jalpy kvotamyz 20 myń danaǵa jetedi, – dedi Gevorg Papoıan.
Buǵan deıin Eýrazııalyq ekonomıkalyq komıssııa keńesiniń sheshimimen Armenııaǵa 15 myń elektromobıldi baj salyǵynsyz ımporttaýǵa kvota berilgen bolatyn.
Eýrazııalyq ekonomıkalyq komıssııa Qazaqstanǵa elektromobılderdi jeńildikpen ákelýge arnalǵan kvotany uzartpaıtyny habarlanǵan edi.
Osyǵan deıin Eýrokomıssııa elektromobılderge kóshý erejelerin jeńildetýdi usynǵan bolatyn.
