Armenııa EAEO-nyń jasandy ıntellekt boıynsha birlesken bastamalaryn qoldady
ASTANA. KAZINFORM – Armenııa Respýblıkasynyń vıtse-premeri Mger Grıgorıan Astanada ótip jatqan V Eýrazııalyq ekonomıkalyq forýmnyń plenarlyq sessııasynda sóz sóılep, EAEO aıasynda jasandy ıntellektini jaýapty damytý týraly birlesken qujat qabyldaýdyń mańyzdylyǵyn atap ótti.
M.Grıgorıan Qazaqstannyń tóraǵalyǵy kezeńindegi kún tártibi mazmundy bolǵanyn ári tsıfrlyq transformatsııanyń praktıkalyq máselelerine baǵyttalǵanyn atap ótti.
– Búgingi kún tártibindegi negizgi taqyryptardyń biri – jasandy ıntellekt ekeni zańdy. Tereń tehnologııalyq transformatsııa kezeńi bastalyp jatyr. Munda JI salasyndaǵy jahandyq báseke tıimdilik pen ónimdilikti arttyrý máselesi ǵana emes, memleketterdiń ekonomıkalyq jáne tehnologııalyq egemendiginiń de mańyzdy faktory bolyp otyr, – dedi Armenııa ókili elordada Táýelsizdik saraıynda ótken otyrysta.
Onyń aıtýynsha, Armenııa EAEO elderindegi JI tehnologııalaryn damytý jolyndaǵy mańyzdy qadam retinde Jasandy ıntellektini jaýapkershilikpen damytý týraly birlesken málimdeme qabyldaýyn qoldaıdy.
– Bul qujat tehnologııalardyń etıkasy, qaýipsizdigi jáne ashyqtyǵy boıynsha ortaq qaǵıdattardy bekitip, yntymaqtastyǵymyzdy azamattarymyz ben ekonomıkalarymyzdyń naqty qajettilikterine baǵyttaıdy. JI-di damytýdaǵy jaýapty ári ınnovatsııalyq tásil elderimizge turaqty, qaýipsiz jáne básekege qabiletti bolashaq qalyptastyrýǵa múmkindik beretinine senimdimin. Armenııa osy baǵyttaǵy barlyq birlesken bastamalardy júzege asyrý úshin mazmundy dıalog pen ortaq praktıkalyq jumysqa daıyn, – dedi vıtse-premer.
Óz sózinde M.Grıgorıan JI-di damytý úshin turaqty bilim berý, ınfraqurylymdyq jáne ınstıtýtsıonaldyq negiz qalyptastyrýdyń mańyzyn atap ótti.
– Zamanaýı tildik modelder men JI júıelerin damytý joǵary ónimdi esepteý qýattaryna qoljetimdilikpen tikeleı baılanysty. Osyǵan baılanysty derekterdi óńdeý ınfraqurylymy men bultty sheshimderdi damytý – Armenııanyń memlekettik saıasatynyń basym baǵyttarynyń biri, – dedi Mger Grıgorıan.
Aıta keteıik, EAEO elderi jasandy ıntellektini jaýapkershilikpen damytý týraly birlesken málimdeme qabyldady.
