Armenııa beıbit kelisimge qol qoıylǵannan keıin Ázerbaıjanǵa qarsy talap-aryzdaryn qaıtaryp alady
ASTANA. KAZINFORM — Armenııa Ázerbaıjanǵa qarsy halyqaralyq sot ınstantsııalaryna bergen talap-aryzdaryn eki el arasynda beıbit kelisimge túpkilikti qol qoıylǵannan keıin qaıtaryp alady. Bul týraly Kazinform agenttiginiń Armenııadaǵy menshikti tilshisi Armenpress basylymyna silteme jasap habarlady.
— Armenııa Respýblıkasy halyqaralyq sottardyń eshqaısysynda óz múddesin qorǵaýdan eshqashan bas tartpaıdy. Al Armenııa men Ázerbaıjan arasyndaǵy qazirgi daýlarǵa kelsek, beıbit úderistiń logıkasyna sáıkes, taraptardyń bir-birine qarsy talap-aryzdaryn qaıtaryp alý týraly sheshim qabyldanýy múmkin. Alaıda bul tek Armenııa Respýblıkasy men Ázerbaıjan Respýblıkasy beıbit kelisimge túpkilikti qol qoıǵan jaǵdaıda ǵana júzege asady, — dedi Armenııa premer-mınıstri apparatynyń basshysy Lılıt Makýnts Ulttyq jınalystyń turaqty komıssııalarynyń birlesken otyrysynda.
Aıta keteıik, Ázerbaıjan men Armenııa arasyndaǵy parafırlengen beıbit kelisimniń 15-tarmaǵynda qujatqa qol qoıylǵanǵa deıin eki el arasynda týyndaǵan máselelerge qatysty barlyq memleketaralyq talap-aryzdy, shaǵymdy, qarsylyqty, sot protsesi men daýdy qaıtaryp alý, kúshin joıý nemese ózge de jolmen retteý qarastyrylǵan.
Osy tarmaqqa sáıkes, tıisti rásimder kelisim kúshine engennen keıin bir aı ishinde aıaqtalýǵa tıis. Sonymen qatar taraptar bolashaqta osyndaı isterdi bastamaýǵa jáne úshinshi taraptar bir-birine qarsy qozǵaǵan osyǵan uqsas isterge qatyspaýǵa mindetti.
Eske salaıyq, buǵan deıin Armenııanyń jańa Konstıtýtsııasy jobasynyń mátini qarasha aıynda jarııalanatynyn habarlaǵanbyz.