Armenııa Ázerbaıjannan elektr energııasyn satyp alý múmkindigin qarastyryp jatyr
ASTANA. KAZINFORM — Armenııa Ázerbaıjanmen elektr energııasyn ózara jetkizý múmkindigin zerttep jatyr. Qajet bolǵan jaǵdaıda kórshi elden elektr energııasyn satyp alý da qarastyrylyp otyr. Bul týraly Armenııanyń aýmaqtyq basqarý jáne ınfraqurylym mınıstri Davıd Hýdatıan málimdedi, dep habarlaıdy Kazinform agenttiginiń óńirdegi menshikti tilshisi.
Mınıstrdiń aıtýynsha, qoldanystaǵy ınfraqurylymdy zertteý onyń salystyrmaly túrde az ınvestıtsııa jumsaý arqyly paıdalanýǵa jaramdy ekenin kórsetken.
Osyndaı tásil Kars — Gıýmrı elektr berý jelisine qatysty da qarastyrylyp jatyr. Bul jeli Armenııaǵa elektr energııasynyń artyq kólemin Túrkııaǵa satýǵa nemese qajet bolǵan jaǵdaıda odan elektr energııasyn satyp alýǵa múmkindik beredi.
Hýdatıannyń aıtýynsha, buǵan deıin Armenııada elektr energııasy artyǵymen bolǵan. Alaıda tutyný kóleminiń ósýi, sonyń ishinde jasandy ıntellekt salasyna qatysty kásiporyndar men derekterdi óńdeý ortalyqtarynyń damýy kórshi elderden qosymsha elektr energııasyn jetkizýdi qajet etýi múmkin.
Qazirgi ýaqytta Armenııa Iranǵa tabıǵı gazdyń ornyna barterlik shema boıynsha elektr energııasyn jetkizedi. Sonymen qatar Grýzııaǵa da elektr energııasyn eksporttaıdy.
Aldaǵy ýaqytta Erevan kórshi memlekettermen, sonyń ishinde Ázerbaıjanmen energetıkalyq yntymaqtastyqty keńeıtýdi qarastyryp otyr.
Buǵan deıin Armenııa premer-mınıstri Nıkol Pashınıan Erevan men Baký arasynda aýmaq aıyrbastaý bastamasyn kótergenin jazǵanbyz.
