Armenııa Ázerbaıjanmen ekijaqty saýda-sattyqty jandandyrmaq
ASTANA. KAZINFORM — Armenııa úkimeti Ázerbaıjanmen beıbit qarym-qatynasty nyǵaıta túsý úshin ekijaqty saýda-sattyqty jáne iskerlik baılanystardy qaıta jandandyrýǵa yntaly. Ony Armenııa úkimetiniń 2026-2031 jyldarǵa arnalǵan baǵdarlama jobasynan ańǵarýǵa bolady, dep habarlaıdy Kazinform agenttiginiń óńirdegi menshikti tilshisi.
Bul qujat 20 tamyzda ótetin Armenııa úkimeti otyrysynyń kún tártibine «Armenııa Respýblıkasy Úkimetiniń baǵdarlamasy týraly» degen ataýmen engizilgen. Elektrondyq úkimettiń resmı portalynda baǵdarlamanyń jobasy, negizdemeleri jáne qosymshalary jarııalanǵan.
Baǵdarlama jobasyna saı, beıbit qarym-qatynasty ınstıtýtsıonaldyq turǵydan bekitý jáne nyǵaıtý maqsatynda el úkimeti Armenııa men Ázerbaıjan arasyndaǵy beıbitshilik pen memleketaralyq qatynastardy ornatý týraly kelisimge qol qoıý jáne ony ratıfıkatsııalaý jumysyn, memlekettik shekarany delımıtatsııalaý jáne demarkatsııalaý protsesin jalǵastyrady, sondaı-aq eki eldiń azamattyq qoǵamdary men isker toptary arasyndaǵy baılanystardy jáne ekijaqty saýda-sattyqty jandandyrady.
Bul rette qujatta ekijaqty saýdanyń naqty bastalý ýaqyty nemese kólemi týraly, bolmasa saýda-sattyqqa shyǵarylatyn taýarlardyń túrleri týraly aqparat kórsetilmegen.
Buǵan deıin Armenııanyń Ázerbaıjanǵa taýar eksporttaýǵa daıyndalyp jatqany týraly habarlanǵan bolatyn.
Raıhan Rahmetova
