Armenııa Ázerbaıjan jáne Túrkııamen temirjol qatynasyn iske qospaq
ASTANA. KAZINFORM — Armenııa premer-mınıstri Nıkol Pashınıan TRIPP jobasyn iske asyrý aıasynda Armenııanyń Ázerbaıjan jáne Túrkııamen temirjol qatynasy qaıta jandanatynyn, sondaı-aq óńirdegi ózge de kólik-kommýnıkatsııalyq baılanystardyń nyǵaıa túsetinin málimdedi.
Erevanda ótken «Armenııa — Ulybrıtanııa 2026» bıznes-forýmynda sóz sóılegen Pashınıan Armenııanyń Ázerbaıjanmen beıbitshilik ornatý jáne óńirlik kommýnıkatsııalardy ashý aıasynda ekonomıkalyq damýdyń jańa kezeńine qadam basqanyn atap ótti. Onyń sózinshe, úkimet qazir TRIPP jobasyn iske qosýǵa daıyndalyp jatyr.
Pashınıan bul jobany Armenııa men jalpy óńirdiń ekonomıkalyq ortasyn túbegeıli ózgertetin «negizgi tetik» dep baǵalady.
— Aldaǵy ýaqytta TRIPP jobasyn júzege asyrýmen qatar, Armenııa — Túrkııa shekarasyn ashý, sondaı-aq Armenııa — Ázerbaıjan jáne Armenııa — Túrkııa baǵyttarynda temirjol qatynasyn iske qosý kózdelip otyr, — dedi premer-mınıstr.
Ol sondaı-aq Parsy shyǵanaǵy men Qara teńiz arasyndaǵy temirjol qatynasyn damytý, «Soltústik — Ońtústik» jobasyn júzege asyrý jáne Shyǵys — Batys baǵytynda avtomobıl joldaryn ashý josparlanyp otyrǵanyn aıtty. Bul jobalardyń barlyǵy «Beıbitshilik jolaıryǵy» tujyrymdamasynyń aıasynda júzege asyrylmaq. Sonymen qatar Armenııa munaı jáne gaz qubyrlaryn salý múmkindigin qarastyryp, elektr energııasyn tasymaldaý jelilerin tartý máselesi boıynsha kelissózder júrgizip jatyr.
Pashınıan óńirdegi kólik-kommýnıkatsııalyq baılanystyń keńeıýi onyń ınvestıtsııalyq tartymdylyǵyn arttyrýǵa jol ashatynyn atap ótti. Onyń aıtýynsha, keıingi bes jylda Armenııa ekonomıkasy orta eseppen 7,9 paıyz ósken. Al aldaǵy bes jylda úkimet jyl saıyn orta eseppen 6 paıyz ekonomıkalyq ósimge qol jetkizýdi kózdep otyr. 2025 jyly eldiń jalpy ishki ónimi 2018 jylmen salystyrǵanda 53 paıyzǵa joǵary boldy.
Erevanda alǵash ret uıymdastyrylǵan «Armenııa — Ulybrıtanııa 2026» bıznes-forýmyna úkimet pen Ortalyq bank ókilderi, halyqaralyq qarjy uıymdary, Ulybrıtanııanyń dıplomatııalyq korpýsy, bıznes qaýymdastyǵy, sondaı-aq bilim jáne ǵylym salasynyń ókilderin qosa alǵanda, 2 myńǵa jýyq adam qatysty.
Eske salaıyq, buǵan deıin Erdoǵan Armenııamen baılanysty jaqsartýdy qoldaıtynyn málimdegenin habarlaǵanbyz.
