Armenııa áýe keńistigin ýaqytsha jabady
ASTANA. KAZINFORM – Armenııada 3–5 mamyr aralyǵynda jalpy maqsattaǵy avıatsııa reısterin oryndaýǵa ýaqytsha tyıym salynady, dep habarlaıdy Kazinform agenttiginiń Erevandaǵy menshikti tilshisi.
Armenııa Respýblıkasynyń Azamattyq avıatsııa komıtetiniń málimetinshe, shekteý elde aýqymdy halyqaralyq is-sharalardyń ótýine baılanysty engizilip otyr. Atap aıtqanda, VIII Eýropalyq saıası qoǵamdastyq sammıti, Armenııa–EO sammıti jáne «Erevan dıalogy» bastamasy ótedi. Sondaı-aq kóptegen sheteldik delegatsııanyń kelýi josparlanǵan.
– Qaýipsizdik maqsatynda 2026 jylǵy 3–5 mamyr aralyǵynda Armenııanyń áýe keńistiginde jalpy maqsattaǵy avıatsııanyń kez kelgen ushýlaryna, sonyń ishinde azamattyq ushqyshsyz ushý apparattaryna tyıym salynady, – delingen resmı málimdemede.
Buǵan deıin VIII Eýropalyq saıası qoǵamdastyq (EQS) sammıti 2026 jylǵy 4 mamyrda Erevanda ótetini habarlanǵan edi.
Aldaǵy sammıttiń negizgi taqyryptarynyń biri – ózara baılanys máselesi. Atap aıtqanda, Orta dálizdi (Transkaspıı halyqaralyq kólik baǵyty) damytý jáne Eýropa, Ońtústik Kavkaz ben Ortalyq Azııa arasyndaǵy taýarlar, energııa resýrstary jáne talshyqty-optıkalyq kommýnıkatsııalar boıynsha úzdiksiz baılanysty qamtamasyz etý máseleleri talqylanady.
