Armenııa astanasyndaǵy telemunarada elimizdiń týy beınelendi
EREVAN. KAZINFORM – Respýblıka kúni merekesine oraı Erevan telemunarasynda Memlekettik týymyz beınelendi, dep habarlaıdy Kazinform agenttiginiń Erevandaǵy menshikti tilshisi.
Merekelik bezendirý Qazaqstan elshiliginiń bastamasy jáne Armenııa tarapynyń qoldaýy aıasynda uıymdastyryldy. Bıiktigi 310 metrden asatyn Erevan telemunarasynda jarqyrap turǵan kók týymyzdy tamashalaýǵa jınalǵandardyń qarasy qalyń.
Munara alańyna jınalǵandar atap ótkendeı, bul - eki el arasyndaǵy berik dostyq pen ózara qurmettiń jarqyn kórinisi. Bastamaǵa Armenııa tarapynyń tıisti qoldaý kórsetýi resmı Astana men Erevan arasyndaǵy qarym-qatynastyń joǵary deńgeıde ekenin aıǵaqtaıdy.
Eske salaıyq, búgin Prezıdent Qasym-Jomart Toqaev Memlekettik tý kóterý rásimine qatysty.
Sondaı-aq, Prezıdent Qasym-Jomart Toqaevtyń atyna shet memleketter basshylary men halyqaralyq uıymdar jetekshilerinen ulttyq mereke - Respýblıka kúnine baılanysty quttyqtaýlar kelip tústi.
