Armenııa AQSh-tyń TRIPP temirjol qurylysyna qatysýyn qarastyryp jatyr

ASTANA. KAZINFORM — AQSh-tyń TRIPP jobasy aıasynda temirjol qurylysyna qatysý múmkindigi talqylaný ústinde. Bul týraly premer-mınıstr Nıkol Pashınıan Erevanda ótip jatqan «Beıbitshilik jáne kópjaqty yntymaqtastyqty ornatý» halyqaralyq forýmynda sóılegen sózinde málimdedi, dep habarlaıdy Kazinform menshikti tilshisi.

— Qazirgi ýaqytta biz amerıkalyq seriktesterimizben Ázerbaıjannyń negizgi bóligin Nahıchevanmen baılanystyratyn temirjol qurylysy boıynsha kelissóz júrgizip jatyrmyz. Nelikten AQSh? Óıtkeni bul joba — TRIPP bastamasynyń ajyramas bóligi, — dep atap ótti úkimet basshysy.

Buǵan deıin AQSh Memlekettik departamentiniń Eýropa jáne Eýrazııa isteri bıýrosynyń dırektory Brendan Hanrahan qyrkúıek aıynda Armenııa vıtse-premeri Mger Grıgorıanmen kezdesýi kezinde Vashıngtonnyń Armenııaǵa TRIPP jobasyn iske asyrýǵa 145 mln dollar bólýdi josparlap otyrǵanyn málimdegen bolatyn.

Sonymen qatar Armenııa Túrkııadan Ázerbaıjanǵa júk kólikteriniń tranzıtin qamtamasyz etýge daıyn ekeni jáne Reseıden Ázerbaıjan arqyly Armenııaǵa temirjol arqyly taýar tranzıtin ornatýdy josparlap otyrǵany habarlandy. 

Eske sala ketsek, Ázerbaıjan prezıdenti Ilham Álıev Qazaqstanǵa memlekettik sapary barysynda Ázerbaıjan arqyly Armenııaǵa taýarlardy tasymaldaýǵa qoıylǵan shekteýlerdiń alynyp tastalatynyn málimdedi.

Armenııaǵa alǵashqy júk tranzıti retinde qazaqstandyq bıdaı jiberildi.