Armenııa AQSh-pen birge TRIPP baǵytyn jalǵa alý merzimin taqylap jatyr

ASTANA.KAZINFORM - Erevanda ótken «Álem qıylysy: aımaqtyq kommýnıkatsııalar men yntymaqtastyqty damytý» atty halyqaralyq konferentsııada Armenııa premer-mınıstri Nıkol Pashınıan TRIPP kólik baǵyty boıynsha jalǵa alýdyń eki múmkin stsenarııin jarııalady, dep habarlaıdy Kazinform agenttiginiń menshikti tilshisi.

Úkimet basshysynyń aıtýynsha, eki jalǵa alý nusqasy qarastyrylyp otyr: 99 jyldyq nemese 49 jylǵa jalǵa alý.

-Búgin TRIPP baǵyty boıynsha eki jalǵa alý stsenarııi talqylandy: 99 jyldyq jáne 49 jyldyq stsenarıı. Bul jalǵa alý sharttarynyń negizdemesi qandaı? Onda ınvestıtsııalar salynady jáne ınvestordyń kiris mólsherlemesinen belgili bir kepili bolýy kerek. Eger biz bul jerdi bes jylǵa jalǵa beremiz desek, eshkim ınvestıtsııa salmaıdy, sebebi ınvestıtsııany bes jyl ishinde qaıtarý múmkin emes, - dedi Pashınıan.

Premer-mınıstr talqylaýlar tek qarjylyq jáne ekonomıkalyq sıpatta ekenin jáne eshqandaı saıası quramdas bólikti qamtymaıtynyn atap ótti. Ol sondaı-aq Armenııada TRIPP jobasyn júzege asyrýdyń alǵashqy qadamy normatıvtik bazany qurý ekenin de atap ótti.

-Eske sala keteıin, bul bazany qurýdyń birinshi kezeńi - jalpy bazany belgileıtin Vashıngton deklaratsııasy. Kelesi kezekte Armenııa men Amerıka Qurama Shtattary arasynda birlesken kásiporyn qurylady jáne kompanııany basqarý úshin dırektorlar keńesi qurylady. Armenııa men AQSh dırektorlar keńesinde ókildik etedi, al dırektorlar keńesindegi aktsııalardy bólý, árıne, qazirgi ýaqytta talqylanyp jatqan úlestik qatysýǵa baılanysty bolady. Degenmen, strategııalyq mańyzdy máseleler boıynsha Armenııa sheshýshi daýysqa ıe bolatynyn atap ótý mańyzdy, - dedi Pashınıan.

Buǵan deıin Armenııada TRIPP baǵytynyń qurylysyn bastaý merzimi belgilengeni týraly habarlanǵan bolatyn.