Armenııa AES-sy jóndeý jumystaryna baılanysty jabyldy
ASTANA.KAZINFORM — Armenııadaǵy Metsamor atom elektr stantsııasy bes aıǵa josparly jóndeý jumystaryna baılanysty jabyldy, dep habarlaıdy Kazinform agenttiginiń Erevandaǵy tilshisi.
Aýmaqtyq ákimshilik jáne ınfraqurylym mınıstri Davıd Hýdatıan bul sheshimdi úkimet otyrysy kezinde jarııalady. Ol bul jabylý stantsııanyń qyzmet etý merzimin 2036 jylǵa deıin uzartý baǵdarlamasyn iske asyrýmen baılanysty ekenin málimdedi.
Mınıstr jalpy AES jumysynyń toqtaý merzimi 153 kún bolatynyn naqtylady. Salystyrmaly túrde, jyl saıynǵy josparly jóndeý jumystaryna baılanysty toqtaý ádette 45 kúnnen aspaıdy. Uzartylǵan toqtaý merzimi aldaǵy jumystyń kólemi men kúrdeliligine baılanysty.
Buǵan deıin stantsııanyń bas dırektory Edýard Martırosıan da jańǵyrtý jobasynyń bóligi retinde jańa júıeni engizý boıynsha «Rosatom» memlekettik korporatsııasymen negizdemelik kelisimge qol jetkizilgenin atap ótti. Bastapqyda jumys shamamen 160 kúnge sozylady dep josparlanǵanymen, Reseı tarapymen keńeskennen keıin bul merzim 140 kúnge deıin qysqartyldy. Energııa blogyn óshirý jáne qaıta iske qosý úshin qosymsha ýaqyt qajet bolady.
Armenııa atom elektr stantsııasy (AAES) eldegi elektr energııasyn óndirýdiń shamamen úshten birin qamtamasyz etedi. 1-blok 1976 jyldyń jeltoqsanynda, 2-blok 1980 jyldyń qańtarynda paıdalanýǵa berildi. Spıtak jer silkinisinen keıin stantsııa 1989 jyly jabyldy, al 2-blok 1995 jyldyń qarashasynda jumysyn qaıta bastady.
2023 jyldyń jeltoqsanynda «Rosatom qyzmeti» men «Armenııa atom elektr stantsııasy» JAQ stantsııanyń jumys merzimin 2036 jylǵa deıin uzartý baǵdarlamasyn iske asyrý týraly negizdemelik kelisimge qol qoıdy.
Buǵan deıin Armenııa modýldik atom elektr stantsııasyn salýdy qarastyryp jatqany habarlanǵan bolatyn.
