«Armenııa 2010» NATO jattyǵýyna qazaqstandyq mamandar da qatysady
BRıÝSSELЬ. Tamyzdyń 31-i. QazAqparat /Dımash Syzdyqov/ - Aǵymdaǵy jyly qyrkúıektiń 11-17-si aralyǵynda Armenııanyń Arznı qalasynda tabıǵı apat saldaryn joıý stsenarııi boıynsha «Armenııa 2010» NATO jattyǵýy ótedi.
Jattyǵýǵa Eýroatlantıkalyq seriktestik keńesine qatysýshy 15 eldiń, onyń ishinde Qazaqstannyń ókilderi, Jerorta dıalogynyń, sondaı-aq taǵy 11 memlekettiń ókilderi - barlyǵy 600-den astam adam jáne 40-qa jýyq baqylaýshy qatysady, dep habarlady NATO-nyń baspasóz qyzmetinen.
«Armenııa 2010» jattyǵýy NATO-ǵa jáne seriktes elderge tabıǵat apatynyń saldaryn joıý máselelerindegi tájirıbelerin shyńdaýǵa jáne tótenshe jaǵdaılardaǵy yntymaqtastyqtaryn keńeıtýge múmkindik beredi, - delingen Alıanstyń baspasóz baıanynda.
Jattyǵý stsenarııi boıynsha, tótenshe jaǵdaılar jónindegi bólimderdiń ókilderi kóptegen adam qurbandyǵyna jáne hımııalyq, radıoaktıvti ýlanýǵa ákelgen, ınfraqurylymǵa edáýir zardap tıgizgen jer silkinisiniń saldaryn joıýlary kerek.
NATO mundaı keń kólemdi jattyǵýdy jyl saıyn ótkizip turady. Esterińizge sala keteıik, byltyr Qazaqstannyń Almaty oblysynda «Jetisý - 2009» jattyǵýy ótken bolatyn.
