Armanjan Baıtasov Azııa daýysy festıvali týraly: Kontsert úsh kún ótedi

ASTANA. QazAqparat – Bıyl shilde aıynyń aıaǵyna qaraı «Medeý» muz aıdynynda «Azııa daýysy» festıvaliniń áýenderi qaıtadan shyrqalady. Bul týraly Jibek Joly telearnasyndaǵy «Jańa túngi stýdııa» baǵdarlamasynda festıvaldiń bas prodıýseri Armanjan Baıtasov aıtty, dep habarlaıdy QazAqparat tilshisi.

Araǵa 19 jyl salyp atalmysh joba úlken sahnaǵa qaıta oraldy.

«Osynyń aldynda «Azııa daýysy» 2004 jyly uıymdastyrylǵan edi. Bul konkýrsty qaıta jańǵyrtýǵa kóp adam úles qosqysy keldi. «Azııa daýysyn», Almatyny, «Medeý» muz aıdynyn ózara ajyratýǵa bolmaıdy, bul qundylyqtarymyz bir-birimen tyǵyz baılanysty. Osyndaı aýqymdy mádenı is-sharalardy uıymdastyrý týrısterdi tartýǵa, qalanyń tanymaldyǵyn kóterýge eleýli úles qosady. Qazaqstan úshin «Azııa daýysy» mańyzdy joba dep sanaımyn», - dedi A. Baıtasov.

Osy oraıda ol «Azııa daýysy» jobasy óner súıer qaýym úshin tartymdy ekenin aıtty.

«Festıval birazdan beri ótkizilmese de, bul brendti kópshilik umyta qoıǵan joq. «Azııa daýysyna» qatysty kóptegen jaqsy estelikter, nátıjeli ıdeıalar bar. Atap aıtqanda, 28 shildeden bastap úsh kún qatarynan kontsert bolady. 30 shildede tanymal toptar, ánshiler óner kórsetedi», - dedi Armanjan Baıtasov.

Budan buryn habarlanǵandaı, byltyr qazan aıynyń basynda Almaty ákimi Erbolat Dosaev «Azııa daýysy» festıvalin qaıta jańǵyrtýdy josparlap otyrǵanyn aıtty.

Keıin festıval 2023 jyldyń shilde aıynyń sońyna josparlanǵany belgili boldy.

«Azııa daýysy» halyqaralyq festıvaline sheteldegi qandastarymyz da qatyspaq.

1990 jyly «Azııa daýysy» halyqaralyq mýzykalyq festıvalinde alǵash ret 15 memleketten kelgen qatysýshy «Medeý» muz aıdynynda óner kórsetken edi.