Armanym - «Romeo men Djýlette» qoıylymynda Romeony somdaý - Taıyr Gataýov
ALMATY. 20 aqpan. QazAqparat /Erlik Erjanuly/ - Qazaqstanda balet óneri qarqyndy damyp kele jatyr. Oǵan memleket tarapynan qajeti qoldaý jasalýda.
Astana qalasyndaǵy Kúlásh Baıseıitova atyndaǵy ulttyq opera jáne balet teatrynyń balet trýppasynyń solısi Taıyr Gataýov QazAqparat tilshisine bergen suhbatynda osylaı aıtty.
«Elimizde kenje damyǵan óner salalarynyń biri - balet. Osyǵan qaramastan ol asa joǵary qarqynmen órkendep kele jatyr. Oǵan 2000 jyly qurylyp, ulttyq mártebege ıe bolǵan bizdiń Kúlásh Baıseıitova atyndaǵy opera jáne balet teatryn mysalǵa keltirýge bolady», - deıdi ol.
1984 jyly 19-qazanda Oral qalasynda ómirge kelgen Taıyr Talǵatuly 2003 jyly Aleksandr Seleznev atyndaǵy Almaty horegrafııa ýchılışesin, 2007 jyly Mahambet Ótemisov atyndaǵy Batys Qazaqstan memlekettik ýnıversıtetin pedagog-horeograf mamandyǵy boıynsha qyzyl dıplommen bitirdi. Al 2001-2003 jyldary Almatydaǵy Abaı atyndaǵy memlekettik opera jáne balet teatrynda, 2007 jyly Italııanyń Mılan qalasyndaǵy áıgili La Skala teatrynda tájirıbeden ótti. 2002 jyly Novosibirde ótken balet ártisteriniń halyqaralyq baıqaýynda dıplomant atanǵan ol 2006 jyly Astanada bolǵan «Shabyt» respýblıkalyq baıqaýynda birinshi oryn aldy. Sondaı-aq sol jyly Astanada ótken Halyqaralyq balet ártisteri baıqaýynda 3-júldeni ıelendi. Otandyq mádenıet pen ónerdi damytýǵa úles qosqan 50 qaıratkerge jyl saıyn beriletin Memlekettik stıpendııany qatarynan 3 jyl boıy ıelengen T. Talǵatulynyń endigi armany «Romeo men Djýlette» qoıylymynda Romeony somdaý bolyp otyr. Buǵan deıin ol P. Chaıkovskııdiń «Aqqýly kólinde» Rotbart, «Şelkýnchıginde» hanzada, B. Asafevtiń «Baqshasaraı sýburqaǵynda» Vatslav, A. Adannyń «Jızelinde» Pa-de-de, «Korsarynda» Pa-de-sklıaf, F. Shopenniń «Shopenıanasynda» bozbala, L. Mınkýstyń «Baıaderkasynda» altyn puttyń balet solısi bolǵan edi.
