Armanymyz – Týymyzdy kókte jelbiretip, Ánuranymyzdy áýeletý – paravoleıbolshy Janǵalı Súıeýov

Qytaıdyń Hanchjoý qalasynda bastalǵan jazǵy Parazıada oıyndarynda atyraýlyq 25 sportshy baq synap jatyr. Sonyń biri – paravoleıbolshy Janǵalı Súıeýov. Ulttyq qurama múshesi Parazıada oıyndarynyń ashylý saltanatynda Qazaqstannyń Týyn ustap shyqty, dep habarlaıdy Kazinform. 

Atyraý oblysynyń týmasy Janǵalıdyń aıtýynsha, ol otbasynyń tuńǵyshy bolǵandyqtan jumysqa erte aralasqan. Qarshadaıynan júk kóligin júrgizgen. Parasortshy 23 jasynda bolǵan oqıǵasy týraly aıtyp berdi. 

– Ár otbasynyń arqasúıeri de, qamqorshysy da – áke. Bizdiń ákemiz ómirden erte ótti. Bul jaıt maǵan qatty áser etti. Tipti erte eseıtti desem de bolady. Otbasynyń úlkeni bolǵan soń mektepti bitirgen jyly jumysqa ornalasýdy kózdedim. Maqsatym – anama qolǵabys etip, baýyrlaryma qamqor bolý. Sóıtip, júk kóligine otyrdym. Biraq, bári adamnyń oılaǵanyndaı bolmaıtynyna kóz jetkizdim. Buǵan 2006 jyly jol apatyna ushyrap, aýyr jaraqatpen aýrýhanaǵa túskenim dálel, - deıdi Janǵalı Súıeýov. 

Aýrýhanada oǵan ota jasalǵan. Dárigerler jaraqattyń aýyrlyǵyna baılanysty bir aıaǵyn kesýdi uıǵarǵan. 

– Baýyrlarymdy jetildiremin, anama kómektesemin dep júrgende, bul maǵan ońaı bolmady. Sol kezde 23 jasta edim. Jalyndap turǵan shaǵym ǵoı. Basyma túrli oı kelip, qatty qınaldym. Biraq, taǵdyrdyń synaǵyna qarsy turý qajet degen oıǵa bekindim. Ne isteý qajet? Bir jyldan soń bapkerimiz Baýyrjan Tahaýov otyryp oınaıtyn voleıbol sportymen shuǵyldanýǵa keńes berdi. Bul sportta men sekildi jigitter bar eken. Bapkerdiń keńesimen 2007 jyly paravoleıbolǵa keldim, - deıdi Janǵalı Súıeýov. 

Parasportshy 2008 jyly ulttyq quramanyń sapyna alynǵan. Halyqaralyq dárejedegi sport sheberi ataǵyn da ıelengen. 

– Bapkerimiz bizdiń jigerimizdi janydy. Birneshe elde ótken halyqaralyq saıysqa qatystyq. Bıyl shildede komandamyz Astanada ótken Azııa chempıonatynda kúmis júldeni ıelendi. Sóıtip, 2024 jyly Parıjde ótetin paralımpıadanyń joldamasyna ıe boldyq. Endi parazıada oıyndarynda budan da jaqsy jetistikke jetýdi kózdep otyrmyz. Armanymyz – Týymyzdy kókte jelbiretip, Ánuranymyzdy áýeletý, - deıdi ol. 

Janǵalı bes balanyń ákesi. Úlkeni – ýnıversıtettiń stýdenti, odan keıingisi kolledjde oqıdy. Eki balasy mektepte oqysa, kishisi – eki jasta. Sportshynyń áıeli zerthana qyzmetkeri bolyp jumys istegen. Qazir bala kútimimen úıde otyr. 

– Memleket tarapynan múmkindigi shekteýli jandarǵa járdemaqy beriledi. Biraq, men de, ózge parasportshylar da tek járdemaqymen kún kórýdi qup kórmeımiz. Ásirese, er adam otbasyna qamqor bolyp, tabys ákelýi kerek. Paravoleıboldan ulttyq quramada oınaǵanymyz úshin jalaqy tólenedi. Elimizde parasport túrleriniń keń qanat jaıýy múmkindigi shektelgen jandardyń ekinshi tynysyn ashty dep oılaımyn, - dep pikir bildirdi Janǵalı Súıeýov.