«Armanǵa jol» jartylaı marafonynyń jeńimpazdary mln teńgeden alady
ASTANA. Qazaqparat - Qaraǵandyda osymen ekinshi ret jalpyhalyqtyq «Armanǵa jol» jartylaı marafony ótedi, dep habarlaıdy QazAqparat tilshisi QR Jeńil atletıka federatsııasynyń baspasóz qyzmetine silteme jasap.
Osymen ekinshi ret uıymdastyrylǵaly otyrǵan marafon 20 mamyrǵa josparlanǵan. Marafonda qatysýshylar jasy men múmkindikterine qaraı «Armanǵa jol» - 21 shaqyrym, «Spýtnık» - 14 shaqyrym, «Dostyq» - 7 shaqyrym jáne «Balapan» - 2 shaqyrymnan quralatyn tórt qashyqtyq boıynsha synǵa túsedi.
- «Armanǵa Jol 2018» jartylaı marafonnyń joly IAAF sertıfıkatyna ıe boldy. Jartylaı marafonda joǵary dərejeli ulttyq tóreshileri qyzmet etedi. Marafonnyń jalpy júlde qory - 8 mıllıon teńge. Jartylaı marafonda jeńiske jetken er jáne áıel atlet árqaısysy 1 mıllıon teńgeden alady. Qazirgi tańda «Armanǵa jol» jartylaı marafonyna 1000-nan astam adam tirkelip úlgerdi. Qaraǵandyǵa Amerıka, Chehııa, Reseı, Belarýs, Ózbekstan, Qyrǵyzstan memleketinen sportshylar keledi, - deıdi Qaraǵandy oblystyq jeńil atletıka federatsııasynyń vıtse-prezıdenti Dmıtrıı Karpov.
Qazaqstanda osyndaı buqaralyq sıpattaǵy is-sharalardy ótkizý kezinde qatysýshylardy elektrondyq tirkeý úshin Qazrun jobasy qolǵa alynǵan bolatyn. «Armanǵa jol» marafonyn uıymdastyrýshylar da osy múmkindikti paıdalanbaq. Al júgirýshilerdiń nátıjelerin «Chronotrack» júıesi esepke alady.Onsyz birde-bir halyqaralyq marafon, kásibı turǵyda esepke alynbaıdy.
Byltyrǵy jyly erler arasynda Shyǵys Qazaqstan oblysynan kelgen Andreı Leımenov jeńiske jetken bolatyn. Áıelderden almatylyq Marııa Karabıtskaıa top jarǵan bolatyn.
